Turkiya parlamenti ikki hafta davomida jonivorlar huquqini himoya qiluvchi qonun loyihasini ko‘rib chiqishni rejalashtirgan. Bu haqda Hurriyet xabar berdi.
Me’yoriy nizom hayvonlarga nisbatan shafqatsizlik uchun qamoq jazosini nazarda tutadi. Xususan, qotillik uchun to‘rt yilgacha ozodlikdan mahrum qilinish, hayvonlarni qiynoqqa solish va shafqatsizlik uchun uch yilga qamalish mumkin.
Shuningdek, qonun loyihasida hayvonga boshpana bergan odam uni hayoti davomida parvarish qilish majburiyatini olishi belgilangan. Agar egasi uy hayvonini ko‘chaga haydab yuborsa, 500 lira (taxminan, 70 dollar) miqdorida jarimaga tortiladi. Bundan tashqari, ko‘chadan boqib olingan har qanday uy hayvoni ro‘yxatdan o‘tkazilishi lozim, ularga chip va identifikatsion raqam beriladi.
Qonun loyihasida uy hayvonlari sonini cheklash ham ko‘zda tutilgan. Xususan, har bir xonadonga uchtagacha it boqishga ruxsat berilishi mumkin. Mushuklar soni bo‘yicha aniq ma’lumot berilmagan.
Turkiya Adolat va taraqqiyot partiyasi deputati O‘zlem Zenginning aytishicha, yaqin uch-to‘rt yil ichida mamlakatda uysiz itlarni sterilizatsiya qilish kampaniyasini boshlash kerak, aks holda ularning soni 60 millionga yetadi.
Izoh (0)