Rossiyada ijtimoiy tarmoqlardagi haqoratli so‘zlarga qarshi qaratilgan tuzatishlar kuchga kirgach so‘kish so‘zlari ishlatilgan portlar kamaymadi, deb yozadi “RBK” “Medialogiya” hisob-kitoblariga tayanib.

Foto: “RIA Novosti”

“Medialogiya” “VKontakte”, “Odnoklassniki”, Facebook, Twitter va Instagram’da haqoratli so‘zlar ishlatilgan quyidagi miqdordagi postlarni aniqlagan:

  • 2021-yilning 25—26-yanvar kunlari (tuzatishlar kuchga kirishidan bir hafta avval) — 631,3 mingta;
  • 2021-yilning 1—2-fevral kunlari (tuzatishlar kuchga kirganidan keyin) — 646,1 mingta;
  • 2020-yilning 3—4-fevral kunlari (ijtimoiy tarmoqlarda so‘kinish taqiqlanishidan bir yil avval) — 426,5 mingta.

“Medialogiya” qayd etishicha, 2021-yil yanvar oxiri va fevral boshida ijtimoiy tarmoqlardagi asosiy muhokama mavzulari Aleksey Navalniyning qo‘lga olinishi va buning oqibatida kelib chiqqan norozilik aksiyalari bo‘lgan. Bir yil avval esa ijtimoiy tarmoqlarda asosan ilk koronavirus holatlari, “Peterburgskiy” sport majmuasining qulashi va shuba kiygan holda faxriylarga non topshirgan qrimlik mansabdor ayollar muhokama qilingan edi.

So‘kinishning taqiqlanishi haqidagi yangilikning o‘zi ijtimoiy tarmoqlarda uyatsiz so‘zlar qo‘llanilishining o‘sishiga sabab bo‘ldi, deb yozadi “Ijtimoiy tarmoqlar” agentligi. 2021-yilning 22—23-yanvar kunlari — tuzatishlarning tez orada kuchga kirishi haqidagi yangilik fonida haqoratli so‘zlar qo‘llangan postlar o‘rtacha ko‘rsatkichdan 30 foizga ko‘paygan. Shunga o‘xshash avj nuqtalar 1—2-fevral kunlari — tuzatishlar kuchga kirgandan keyingi dastlabki kunlarda ham kuzatilgan.

Rossiya Davlat dumasi dekabr oyida ijtimoiy tarmoqlarga so‘kinish so‘zlarini aniqlash va o‘chirish majburiyatini yuklovchi qonunni qabul qilgan edi. Tuzatishlar 1-fevraldan kuchga kirdi. Ular tasodifiy holda qo‘llaniladi, chunki ijtimoiy tarmoqlarga haqoratli so‘zlarga nisbatan avtomatik monitoring joriy qilish majburiyatini yuklamaydi. Hozircha so‘kinish so‘zlarini e’tiborsiz qoldirganlik uchun alohida jazo ko‘zda tutilmagan, ammo Ma’muriy kodeksda taqiqlangan kontentni bloklashdan bosh tortganlik uchun jarima nazarda tutilgan.