O‘zbekiston Yevropaning yana bir davlati bilan diplomatik aloqalar o‘rnatdi

3-fevral kuni O‘zbekiston va San-Marino o‘rtasida diplomatik munosabatlarni o‘rnatish to‘g‘risidagi protokolni imzolash marosimi bo‘lib o‘tdi.

“Dunyo” axborot agentligining O‘zbekistonning Italiyadagi elchixonasiga tayanib xabar berishicha, O‘zbekiston tomondan hujjatni elchi Otabek Akbarov, San-Marinodan esa Italiyadagi elchisi Deniela Rotondaro imzoladi.

Ikki mamlakatda ichki protseduralar o‘tkazilgach protokol kuchga kiradi va San-Marino O‘zbekiston bilan diplomatik munosabatlar o‘rnatgan 136-davlatga aylanadi.

Elchi Daniela Rotondaro Rimda joylashgan Oziq-ovqat va qishloq xo‘jaligi tashkiloti (FAO) va Xalqaro qishloq xo‘jaligi jamg‘armasi (IFAD) doirasida o‘zaro hamkorlik qilishga tayyorligini ta’kidladi. Uning fikricha, ikki mamlakat oziq-ovqat xavfsizligi va sog‘lom ovqatlanishni ta’minlash hamda qashshoqlikni yo‘q qilishda hamkorlik qilishi mumkin.

Shuningdek, savdo-iqtisodiy hamkorlik bo‘yicha ikki tomonlama munosabatlarni rivojlantirishdan manfaatdorligini bildirgan. Elchining so‘zlariga ko‘ra, San-Marino investitsiyalarni o‘zaro himoya qilish va rag‘batlantirish, ikki tomonlama soliqqa tortmaslik to‘g‘risidagi ikki tomonlama shartnomalarni ishlab chiqish va imzolashga tayyor.

“Yevropa Ittifoqi bilan yaqin aloqada bo‘lgan San-Marino o‘zbek kompaniyalari va eksportchilariga Yevropa bozorlariga chiqish uchun yaxshi imkoniyatlar taqdim etishi mumkin”, — degan u.

Turizm sohasidagi hamkorlik ham yana bir muhim yo‘nalishga aylanishi mumkinligi ta’kidlangan.

Ma’lumot uchun, San-Marino dunyodagi eng kichik davlatlardan biri (maydoni 61 kvadrat kilometr) hisoblanadi. Mamlakat Janubiy Yevropada joylashgan va to‘rt tomondan ham Italiya bilan chegaradosh. Dunyodagi eng qadimgi konstitutsiyalardan biri amal qiladigan San-Marino ayni paytdagi chegarasi bilan Yevropaning eng uzoq tarixga ega davlati hisoblanadi. Bundan tashqari, San-Marino aholi jon boshiga yalpi ichki mahsulot ko‘rsatkichi (2020-yilda 56 ming 690 dollarga teng bo‘lgan) bo‘yicha dunyodagi eng boy mamlakatlardan biridir.