Toshkent shahar Yunusobod tumanida 6 ta avtomobil ishtirokida yo‘l-transport hodisasi sodir bo‘ldi, deya xabar bermoqda YHXBB.

Foto: YHXBB

Ta’kidlanishicha, 2021-yilning 22-yanvar kuni soat 17:00 larda Yunusobod tumani Yangi Yunusobod ko‘chasida joylashgan Anjir kafesi ro‘parasida haydovchi – 2001-yilda tug‘ilgan X.X. Nexia-2 rusumli avtomobilda harakatlanayotib tezlikni pasaytirgan.

Natijada uning ortidan kelayotgan 1996-yilda tug‘ilgan S.N. boshqaruvidagi Nexia-3, 1977-yilda tug‘ilgan N.R. boshqaruvidagi Epica, 1984-yilda tug‘ilgan M.S. boshqaruvidagi Nexia-2, 1993-yilda tug‘ilgan A.V. boshqaruvidagi Matiz hamda 1992-yilda tug‘ilgan I.R. boshqaruvidagi yana bir Matiz avtomobillari ishtirokida oldinma-ketin to‘qnashuv sodir bo‘lgan.

Foto: YHXBB

To‘qnashuv natijasida tan jarohati olganlar yo‘q.

Mazkur YTH yuzasidan Toshkent shahar IIBB YHXB tomonidan surishtiruv ishlari olib borilmoqda.

Avvalroq Toshkentda to‘rt avtomobil ishtirokida, Samarqandda 4 ta avtomobil ishtirokida hamda Toshkentda masofa saqlamaslik oqibatida 5 ta avtomobil to‘qnashgani haqida xabar berilgandi.