Microsoft korporatsiyasi General Motors konsernining haydovchisiz boshqariladigan avtomobillarni yaratishga mo‘ljallangan Cruise sho‘ba kompaniyasiga 2 milliard dollar sarmoya kiritdi, deb xabar beradi Esquire.
Hamkorlik doirasida Cruise Azure — Microsoft’ning “bulutli” platformasidan foydalanadi. Microsoft saytida e’lon qilingan press-relizga ko‘ra, platforma “haydovchisiz boshqariladigan transport vositalarining tijoratlashuvini tezlashtirish”ga yordam berishi kerak.
“Cruise va GM kompaniyalari Microsoft bilan uzoq yillik strategik bitim imzoladi. U haydovchisiz boshqariladigan transport vositalarining tijoratlashuvini tezlashtirishga, uni xavfsiz, toza va barcha uchun hamyonbop transportga aylantirish uchun xizmat qiladi”, — deyiladi Microsoft’ning Twitter’dagi akkauntida.
Ta’kidlanishicha, Microsoft Cruise bilan hamkorlikdan “kelajakda transport sohasini kengaytirish” maqsadida foydalanadi.
“Raqamli texnologiyalar sohasidagi yutuqlarimiz hayotimizning barcha jabhalarini o‘zgartirib yubormoqda, jumladan, odamlarni tashish va tovarlarni yetkazishni ham. Cruise va GM ‘bulutli’ platformadan foydalanmoqchi ekan, biz kompaniyalar kengayishi va haydovchisiz boshqariladigan avtomobillardan foydalanishni ommalashtirish uchun Azure’ni taqdim etamiz”, — deydi Microsoft bosh direktori Satya Nadella.
Microsoft’dan tashqari Cruise’ga Honda va boshqa investorlar ham sarmoya kiritgan bo‘lib, u kompaniya qiymatining 30 milliard dollarga baholanishiga xizmat qilgan.
Eslatib o‘tamiz, 2019-yilda General Motors kompaniyasi Michigandagi zavodida Cruise AV o‘ziyurar avtomobilining ishlab chiqariladigan versiyasini yaratishga tayyorgarlik doirasida ikki ishlab chiqarish obyekti modernizatsiyasiga 100 million dollardan ortiq investitsiya kiritgandi.
Izoh (0)