Energetika vazirligi “Yangi Angren” IESdagi portlashda vafot etgan 3 kishining oila a’zolariga 105 million so‘mdan moddiy yordam ko‘rsatilganini ma’lum qildi.
Foto: “Xalq so‘zi Online”
20-yanvar kuni “Yangi Angren” issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘lgan, portlash oqibatida uch kishi halok bo‘lgan va yana uch kishi jarohat olgandi. Energetika vazirligi ularning oila a’zolariga moddiy va ma’naviy yordam ko‘rsatilganini ma’lum qilgandi.
Ma’lum qilinishicha, vafot etganlarning oila a’zolariga dafn marosimini o‘tkazish uchun 20—21-yanvar kunlari 4 million 866 ming so‘mdan birinchi moddiy yordam ko‘rsatilgan. 22-yanvar kuni esa ularga qo‘shimcha ravishda 105 million so‘mdan moddiy yordam ko‘rsatildi.
Portlash oqibatida uch kishi vafot etgani yuzasidan jinoyat ishi ochilgan. Bosh prokuratura matbuot xizmati hozirda mazkur holat yuzasidan Angren shahar prokuraturasi tomonidan tergovga qadar tekshiruv harakatlari olib borilayotganini ma’lum qilgan.
