“Korxonadagi ishlab chiqarish vositalari o‘z xizmat vazifasini o‘tab bo‘lgan” — portlash sodir bo‘lgan “Yangi Angren” IESi ishchilari

20-yanvar kuni soat 11:42 da “Yangi Angren” issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘lgani to‘g‘risida xabar berilgandi. Energetika vazirligi portlash oqibatida uch kishi halok bo‘lgani va yana uch kishi jarohat olganini, shuningdek, ularning oila a’zolariga moddiy va ma’naviy yordam ko‘rsatilganini ma’lum qilgan. “Xalq so‘zi online” nashrining IES ishchilariga tayanib yozishicha, korxonadagi ishlab chiqarish vositalari o‘z xizmat vazifasini o‘tab bo‘lgan.

Nashr jurnalistlari mazkur holatga aniqlik kiritish va o‘rganish maqsadida “Yangi Angren” IES rahbari qabulxonasiga qo‘ng‘iroq qilgan, ammo u bilan bog‘lanishning imkoni bo‘lmagan. IES Kasaba uyushmasi rahbari Baxtiyor Najimov esa korxonaga kirish mutlaqo mumkin emasligini tushuntirgan. Shundan so‘ng, muxbirlar smena navbatchiligidan qaytayotgan ishchilar bilan suhbatlashib, ularning fikrlarini tinglash bilan cheklangan.

Ishchilarning ma’lum qilishicha, korxona ishchilarining ijtimoiy muhofazasi rahbariyat e’tiboridan chetda qolmoqda. Texnik xavfsizlik talablari buzilyapti. Mehnat muhofazasi yaxshi yo‘lga qo‘yilmagan. Mavjud ichki tartib-intizom me’yorlariga ham deyarli ahamiyat berilmaydi.

Ishchilarning ta’kidlashicha, korxonadagi ishlab chiqarish vositalari o‘z xizmat vazifasini o‘tab bo‘lgan. Mavjud ta’mirlash jarayonlarida ehtiyot qismlar yetishmaydi. Korxona mo‘rilariga atrof-muhitni zararsizlantirish uchun o‘rnatilgan havo filtrlari ham risoladagidek emas. Ishchi-xizmatchilarning qayd etishicha, keyingi bir yil ichida bir necha marotaba sodir etilgan yong‘in natijasida jiddiy oqibatlar yuzaga kelgan.

Ma’lumotlarga ko‘ra, 19-yanvar kuni IESning 5-son energobloki qozon agregatidagi nuqson tufayli ta’mirga chiqarilgan. Yuz bergan vaziyat oldidan elektr stansiya 560 MVt quvvat bilan ishlagan. 4 ta energoblok ishda, bitta energoblok esa zaxirada bo‘lgan.

Voqea sodir bo‘lgan kuni “Vostokenergoteploizolyatsiya” AJ hamda “Energoqozontozalash” MChJning ta’mirlash ishlarini bajaradigan pudrat tashkilotlari ishni xavfsiz bajarish uchun yo‘riqnoma o‘tkazilib ishga qo‘yilganligi qayd etilgan. Energoblok qozon agregatida ta’mir ishlarini bajarish vaqtida ko‘mir-kukuni havo aralashmasining chaqnashi sodir bo‘lishi oqibatida “Vostokenergoteploizolyatsiya” AJning 3 nafar xodimi olgan jarohatlar natijasida vafot etgan, “Energoqozontozalash” MChJning 3 nafar xodimi esa turli darajadagi kuyish jarohatlari olgan. Ayni paytda ular shifoxonada shifokorlar nazorati ostida, ularning ahvoli barqaror deb baholanmoqda.