Foto: Bahosi ikki yarim yashar bolaning umri va Shavkat Mirziyoyevga yo‘llangan videomurojaatga teng svetofor
Yunusobodning Yunusota ko‘chasidagi ikki yarim yashar bolaning o‘limiga sabab bo‘lgan tartibga solinmagan piyodalar o‘tish joyiga fojiadan salkam besh oy o‘tib svetofor o‘rnatildi. Buning uchun YTHda halok bo‘lgan bolakayning akasi Prezidentga videomurojaat yo‘llashiga ham to‘g‘ri keldi.
2020-yilning 24-avgust kuni voqeadan to‘rt kun avval Toshkent shahar IIBBdan bo‘shatilgan 36 yoshli Tohirxo‘ja Afzalov Cobalt avtomobilini mast holda katta tezlikda boshqarib, Yunusota ko‘chasidagi tartibga solinmagan piyodalar o‘tish joyidan o‘tib borayotgan Gavhar Yusufxo‘jayeva va uning 2,5 yoshli Temurxon ismli o‘g‘lini urib yuborgan. Bolakay olgan og‘ir tan jarohatlari oqibatida vafot etgan.
Hodisadan so‘ng Temurxonning otasi Yevgeniy Chexovskiy hodisa joyiga piyodalar o‘tish joyi belgisini o‘rnatishga qaror qilgan (YTHga qadar voqea joyida bunday belgi bo‘lmagan), shuningdek, Avtomobil yo‘llari bo‘yicha davlat qo‘mitasi huzuridagi “O‘zavtoyo‘lbelgi” korxonasi vakili yordamida piyodalar o‘tish joyidagi yo‘l belgilarini yangilagan.
Yevgeniy Chexovskiy, shuningdek, uning rafiqasi Gavhar Yusufxo‘jayeva voqeadan so‘ng OAVga bergan intervyularida ushbu piyodalar o‘tish joyiga svetofor o‘rnatish zarurligini ta’kidlagan. Halok bo‘lgan bolaning otasi shu maqsadda yaqin-atrofdagi uylarning aholisi bilan birgalikda imzo to‘plashni ham boshlagan.
“Belgi shoxlar bilan to‘silgan edi. O‘sha shoxlarni kesib tashladik, belgini o‘rnatdik, o‘tish joyi chiziqlarini yangiladik. Biz vakolatimizga kirmaydigan ishni qildik, bunday qilmasligimiz kerak edi. Endi bu yerda tugma bilan jihozlangan svetofor qo‘yilishi uchun Toshkent shahar Yo‘l harakati xavfsizligi boshqarmasiga xat tayyorlayapmiz. Odamlar xavfsiz tarzda yo‘lni kesib o‘tishlari uchun”, — degandi o‘shanda Yevgeniy Chexovskiy.
Mavzuga doir: “Bolamni bo‘ynidan ushlab silkita boshladi”. Sobiq IIBB xodimi mashinada 2 yoshli bolani urib yuborgan hodisa tafsilotlari
“Hurmatli prezident-doda... Sizdan svetofor o‘rnatib berishingizni iltimos qilaman. Keksalar va bolalarning hayotini saqlab qoling”, — deb iltimos qilgan bolakay davlat rahbariga yo‘llagan ochiq videomurojaatida. Ushbu murojaatdan so‘ng 21-yanvar kuni Yunusota ko‘chasidagi mash’um piyodalar o‘tish joyida tugmali svetofor paydo bo‘ldi.
Toshkentda piyodalar uchun xavfli, biroq svetofor bilan tartibga solinmagan o‘tish joylari o‘nlab topiladi. Ushbu piyodalar o‘tish joylarida yashovchi aholining qayta-qayta murojaatlariga qaramay, mahalliy vakolatli organlar ko‘ngilsiz hodisalar ro‘y bermagunicha yoki ushbu holat yuzasidan bevosita davlat rahbarining o‘ziga murojaat yo‘llanmagunicha chora ko‘rmaydi.
Shunga o‘xshash hodisa 2018-yil iyulida Toshkentning Abdulla Qodiriy—Mahatma Gandi ko‘chalari kesishmasida yuz bergan edi. 20-iyul kuni ushbu chorrahadagi tartibga solinmagan piyodalar o‘tish joyidan o‘tib borayotgan aktrisa Farangiz Rejametovani katta tezlikda harakatlanib kelgan Mercedes avtomobili urib yuborgan, aktrisa vafot etgan. Ushbu hodisadan 10 kun o‘tib chorrahaga svetoforlar o‘rnatilgan edi. Keyinroq ushbu svetoforlarni o‘rnatish haqidagi buyruq fojiadan 16 kun avval chiqarilgani ma’lum bo‘lgan edi.
