Belgiya poytaxti Bryusselda 13-yanvar, chorshanba kuni “Ibragim uchun adolat” norozilik aksiyasi chog‘ida tartibsizliklar yuzaga keldi. Aksiya o‘tgan dam olish kunlari politsiya uchastkasida vafot etgan qora tanli muhojir Ibragim Barrining xotirasiga bag‘ishlangan.

Foto: AP Photo

Namoyishdan keyin yuzga yaqin odam politsiya uchun haqoratli bo‘lgan shiorlarni baralla aytib, tutun shashkalarini uloqtira boshladi. Tartibga chaqirgan politsiyachilarga tosh yog‘dirdi, politsiya uchastkasini esa yoqib yuborishga urindi.

Tartibsizliklarda qatnashgan kamida 112 kishi qo‘lga olindi.

Bryusselning Sen-Joss kommunasi ma’muriyati rahbari Emir Kir o‘z Twitter’ida yozishicha, tartibsizliklar provokatsiyalarni amalga oshirish va shahar mulkiga zarar yetkazish uchun “vaziyat”dan foydalanib qolgan fuqarolarning mas’uliyatsiz xatti-harakatlari oqibatida kelib chiqqan.

Ayni paytda Belgiya poytaxtida tartib o‘rnatilgan. Transport harakati qayta tiklangan. Shahar xizmatlari hududni tozalashga kirishgan. Politsiya to‘qnashuvlar oqibatida hibsga olinganlar va jabrlanganlarning aniq sonini e’lon qilishi kutilmoqda.

Asli gvineyalik 23 yoshli Ibragim Barri 9-yanvar kuni Bryusseldagi Shimoliy vokzalda hujjatlarni tekshirayotgan politsiyachilarni smartfon kamerasiga olgan. OAVlarga ko‘ra, politsiyachilar karantin qoidalariga zid tarzda vokzal atrofidagi maydonda to‘plangan yoshlarni to‘xtatmoqchi bo‘lgan. Ular Ibragimdan hujjatlarini talab qilgan, ammo u qo‘rqib qochib ketgan. U qo‘lga olingan va politsiya uchastkasiga keltirilgan, u yerda kutilmaganda hushini yo‘qotib, vafot etgan. Ta’kidlanishicha, unda yurak xuruji yuz bergan. Tez yordam shifokorlari uning hayotini saqlab qololmagan. Politsiyachilar defibrillyator yordamida uni jonlantirishga uringan, ammo u nosoz bo‘lib chiqqan.

Qayd etilishicha, Belgiya qiroli Filippning korteji tartibsizliklar markaziga kelib qolgan. Uni namoyishchilardan to‘sish uchun kortejga politsiyachilar hamrohlik qilgan. Monarxga ziyon yetmagan.