Saudiya Arabistoni hukumati yo‘llar ham, avtomobillar ham bo‘lmaydigan ulkan CO2-neytral shahri qurilishini e’lon qildi. Merosxo‘r shahzoda Muhammad ibn Salmon tomonidan taqdim etilgan loyihaga ko‘ra, uzunligi 170 kilometrga yetadigan The Line nomi ostidagi shaharda million kishi uchun uy joylashadi va 380 ming ish o‘rni yaratiladi, deb xabar beradi Motor.

Foto: Neom

The Line Saudiya Arabistoni shimoli-g‘arbidagi Neom “aqlli” shahri yonida ko‘tariladi. 460 kilometrga cho‘zilgan Neomning o‘zi Qizil dengiz qirg‘og‘ida joylashgan bo‘lib, maydoni 26,5 ming kvadrat kilometrni tashkil etadi. Shahar iqlim jihatidan neytral bo‘ladi, u barcha energiyani qayta tiklanuvchi manbalardan oladi.

The Line uch qatlamda quriladi. Yuza qatlamda turar joy binolari va hayot uchun barcha zaruriy infratuzilmalar joylashadi: maktablar, klinikalar, bog‘lar va ko‘ngilochar maskanlar. Xizmat avtomobillar birinchi yerosti sathi bo‘ylab harakatlanadi, ikkinchisi bo‘ylab esa sun’iy intellekt bilan boshqariladigan “ultratezkor” transport o‘rin oladi. Gap xuddi Hyperloop haqida ketmoqda. Ta’kidlanishicha, shaharning bir nuqtasidan istalgan boshqasiga 20 daqiqadan kamroq vaqt ichida yetib boradi.

Foto: Neom

Shahzodaning ta’kidlashicha, bu kabi shaharni qurishdan maqsad — nafaqat atrof-muhitga g‘amxo‘rlik qilish, balki insonlarni ham o‘ylashdan iborat. Uning so‘zlariga ko‘ra, 2050-yilga borib butun dunyo bo‘ylab bir milliard inson kam ifloslangan hududlardan o‘ziga boshpana qidirishga tushadi. Shuningdek, shahzoda ekologik vaziyat yomonlashgani sabab o‘lim holatlari ortayotganini eslatib o‘tgan.

Dastlabki hisob-kitoblarga ko‘ra, “yashil” shaharni qurish uchun 100-200 milliard dollar kerak bo‘ladi. Mablag‘larning asosiy qismi Saudiya Arabistoni suveren boylik fondidan olinadi.