Peruda sud hokimiyati avvalroq koronavirus Microsoft asoschisi Bill Geyts va investor Jorj Soros tomonidan yaratilgani haqida qaror chiqargan Ika hududi sudyalariga nisbatan tekshiruv olib boradi, deb xabar bermoqda “RBK”.

Foto: Getty Images

Tekshiruv “taxmin etilayotgan qonun buzilishlari bor-yo‘qligini aniqlashga yordam beruvchi dalillar yig‘ish” uchun o‘tkaziladi.

Avvalroq xabar berilganidek, dekabr oxirida Chincha va Pisko provinsiyalari Apellyatsiya jinoiy sudi sudyalari Tito Galyegos, Luis Legiya va Toni Changaray og‘ir jinoyatni sodir etganlikda ayblanuvchiga nisbatan dastlabki hibs muddatini uzaytirish haqidagi ishni ko‘rib chiqqan.

Sud qarori matnida ayblanuvchini ozod qilishning rad etilishiga vaj sifatida aytilishicha, koronavirus infeksiyasi pandemiyasi “dunyoga hukmronlik qiluvchi jinoiy elitalar” tomonidan sun’iy ravishda yaratilgan.

Shuningdek, hujjatda ta’kidlanishicha, COVID-19’ni yaratish va tarqatish ortida “yangi dunyo tuzumi mualliflari” — Bill Geyts, Jorj Soros va amerikalik biznesmenlar oilasi— Rokfellerlar turibdi. Sudyalar qayd etishicha, aynan ular “qat’iy maxfiylik sharoitida o‘zlarining 2030-yilgacha bo‘lgan prognozlarni yaratuvchi korporatsiyalarida turib, koronavirusni boshqarmoqda”.

Ayblanuvchining advokati fikricha, sudyalarning bunday bayonoti quruq muhokamaga asoslangan bo‘lib, uning himoyasidagi odamni asosli sud qaroriga bo‘lgan huquqdan mahrum qiladi.

Koronavirus pandemiyasi boshlanganidan keyin infeksiyaning sun’iy ravishda keltirib chiqarilgani haqida ko‘plab fitna nazariyalari tarqaldi. Uni yaratishda Bill Geytsni, Markaziy razvedka boshqarmasini, Xitoy hukumatini ayblashdi. Jahon sog‘liqni saqlash tashkiloti esa virus laboratoriyalarda yaratilgan yoki o‘zgartirilgani emas, balki odamlarga ko‘rshapalaklardan yuqqani haqidagi fikrga qo‘shiladi.

Shuningdek, pandemiya davrida Bill Geyts sayyora aholisi sonini nazorat qilish uchun COVID-19’ga qarshi emlash niqobi ostida odamlarga chip o‘rnatmoqchi ekanligi haqidagi fitna nazariyasi ham ommalashib ketdi. Geyts bunday fikrni rad etishi qiyin ekanligini, “chunki buning o‘zi juda ahmoqona yoki g‘alati” ekanligini aytgandi.