Sharq yakkakurashi yulduzi, aktyor Jeki Chan atrofdagilar yordamisiz yurishga qiynalgani aks etgan video paydo bo‘ldi.

Foto: “Noviye Izvestiya”

Unda “Orzu ajdari” (Wish dragon) animatsion filmining premyerasiga tashrif buyurgan 66 yashar aktyorning hamkasblari yelkasiga qo‘lini qo‘ygan holda yurganini ko‘rish mumkin. Aftidan, uni suratga olish jarayonlaridagi eski jarohatlari bezovta qilmoqda. Shunga qaramay, Jeki muxlislari oldiga hech nima bo‘lmagandek, qaddini tik tutib, yuzida tabassum bilan chiqib borgan.

Aktyor karyerasi davomida bir qancha jiddiy travmalarni boshdan kechirgan. Ba’zi jarohatlar hattoki aktyor hayotiga xavf solgan.

Masalan, “Armour of God” filmining suratga olish jarayonida boshi bilan toshga yiqilganida bosh suyagi yorilgan va miyasiga qon quyilgan. “Drunken Master”ning suratga olish jarayonida ko‘zi jarohatlanganidan keyin esa ko‘r bo‘lib qolishiga oz qolgan. “Project A” filmi esa umurtqa pog‘onasi shikastlanishi va burni sinishiga sabab bo‘lgan.