Aktyor Bahodir Murodov “Charxpalak” serialidagi Hasan obrazi bilan teletomoshabinlar e’tiboriga tushgan. Jurnalist Nargiza Murodova aktyor bilan suhbat uyushtirdi.
“Teatrdan ketishga majbur bo‘ldim!”
— 1986-yili Toshkent davlat san’at institutini aktyorlik yo‘nalishi bo‘yicha imtiyozli diplom bilan tamomlaganman. Kurs sardori bo‘lganim uchun institutni tamomlashga qadar to‘rtta diplom spektaklini sahnalashtirgandim. Shu bois, kursimiz talaba va ustozlar orasida o‘z hurmatiga ega edi. O‘sha yili Satira nomidagi davlat teatri ochildi va kursimizning barcha talabalari u yerda ish faoliyatini boshladi. Ustoz san’atkorlar bilan birga spektakllarda rol ijro etish baxtiga musharraf bo‘lganmiz. Ammo bir necha yildan keyin teatrdan butunlay ketishga va hayotimga yangi sahifa ochishga qaror qilganman.
Uy haqidagi yolg‘on va’dalar...
— Men Toshkent viloyatining Quyi Chirchiq tumanida tug‘ilganman. Shuning uchun ancha yil ijara uyda yashashimga to‘g‘ri kelgan. Eng yomoni farzandlarim ham katalakdek ijara uyda ulg‘ayotgani meni ranjitardi. Teatr rahbariyati bir necha yil ishlagan ijodkorlar uchun ajratiladigan uylardan birini menga berilishini aytgandi. Afsuski, bu va’dalar og‘izda qolib ketdi. Shuga teatrdan ketib, televideniyeda ishlashga qaror qildim. Aktyorlikda omadim kulmagach, televideniyega ishga kirdim. Ishlash bilan birga ustozlarim Tohir Jo‘rayev va Usta Boboyevlar tavsiyasiga ko‘ra, rejissorlik kursida tahsil olganman. Shu bilan hayotim televideniye bilan bog‘lanib ketdi.
Nega aktyorlikni davom ettirmadi?
— “Charxpalak” serialida rejissor taklifiga ko‘ra suratga tushganman. Hasan rolini ijro etganimdan afsuslanmayman. Bu rol sabab, ozmi, ko‘pmi odamlar e’tiboriga tushdim. Rostini aytsam, serialdan keyin rolga takliflar bo‘lmadi, berilgan rollardan esa ko‘nglim to‘lmadi. Balki omad ham kulmagandir. Tan olaman, talabalik yillarimda orzu-umidlarim katta edi, ularga erishish uchun harakat qildim, ammo nimadir yetishmadi.
Eslatib o‘tamiz, Sharof Boshbekov ssenariysi asosida “Charxpalak” seriali 1997—2000-yillar oralig‘ida suratga olingan. Serial rejissori Shavkat Junaydullayev.
Izoh (0)