Samarqand viloyati Kattaqo‘rg‘on tumani “Do‘stlik” mahallasida bir oilaning besh nafar a’zosi is gazidan zaharlandi, hodisa oqibatida uch nafar bola vafot etgan. Bu haqda Bosh prokuratura ma’lum qildi. Avvalroq bu oila “noma’lum etiologiyali zaharlanishdan zararlangani” haqida xabar berilgan edi.
Sud tibbiyot ekspertizasining birlamchi ma’lumotiga ko‘ra, oilaning voyaga yetmagan uch nafar a’zosi — ikki nafar qiz, bir nafar o‘g‘il bola — S.P. (o‘g‘il bola, 2012-yilda tug‘ilgan), M.P. (qiz bola, 2016-yilda tug‘ilgan), Sh.P. (qiz bola, 2019-yilda tug‘ilgan) is gazidan zaharlanish oqibatida vafot etgan.
Oila boshliqlari — 1986-yilda tug‘ilgan D.J. va 1991-yilda S.O.ga is gazidan zaharlanish tashxisi bilan zarur tibbiy muolajalar ko‘rsatilmoqda. Bosh prokuratura axborotida qayd etilishicha, ota-ona ham, uch nafar bola ham 12-yanvar kuni soat 10:00 atrofida “yashash uyi xonasidan is gazidan zaharlanish alomatlari bilan yaqin qarindoshlari tomonidan topilgan”.
“Mazkur holat yuzasidan Kattaqo‘rg‘on tuman prokuraturasi tomonidan tergovga qadar tekshiruv harakatlari olib borilmoqda”, — deyiladi Bosh prokuratura axborotida.
Qayd etish joiz, bu is gazidan zaharlanish oqibatida yil boshidan beri yuz bergan o‘lim bilan bog‘liq jamoatchilikka ma’lum bo‘lgan dastlabki holat emas. Avvalroq, 8-yanvar kuni Sirdaryo viloyatida er-xotin, 4-yanvar kuni Xorazm viloyatida ona va uning 10 yoshli qizi is gazidan zaharlanib halok bo‘lgan edi.
Is gazidan zaharlanish bir muammo bo‘lsa, gaz portlashi bilan bog‘liq holatlar alohida masala. Yil boshidan beri kamida ikkita shunday hodisa qayd etildi — 6-yanvar kuni Qarshida yuz bergan hodisa oqibatida ikki bola halok bo‘ldi, 8-yanvar kuni Xivada sodir bo‘lgan portlash sabab bir qiz vafot etdi.
Izoh (0)