O‘zbek shou-biznesi vakillarining ijtimoiy tarmoqlardagi sahifasini kuzatib boradigan muxlislar ularning ko‘pchiligi uy hayvonlarini boqishga qiziqishini yaxshi biladi. Jurnalist Nargiza Murodova mashhurlarning sevimli jonivorlari haqida ma’lumotlar to‘pladi.

Rayhon farzandlariga mushuk sovg‘a qilolmaydi!

Foto: Instagram / @rayhonganiyeva

Xonanda Rayhon bir necha yildan buyon onasining Ben ismli zotdor itini parvarishlaydi.

– Islom va Imron anchadan buyon mushukcha sovg‘a qilishimni so‘rashadi. Ammo hozircha  bu istaklarini amalga oshirolmayman. Sababi uyimizda rahmatli onamning sevimli Ben laqabli iti bor. U ancha qarib, kuchsizlanib qolgan. Ammo u baribir oilamiz uchun juda qadrli, – deydi xonanda Rayhon.

O‘tgan yilning avgust oyida xonanda Instagram’dagi profiliga itining yo‘qolib qolgani haqidagi xabarni joylagandi. Oradan bir necha kun o‘tib, Ben laqabli it yaxshi insonlar ko‘magida topilganini ma’lum qildi.

Anvar Salimov: “To‘tishunos bo‘lmoqchiman!”

Foto: Instagram / @anvar_salimov_

“Gap yo‘q” va “Maslahat” ko‘rsatuvlari bilan tomoshabinlarga yaxshi tanish bo‘lgan aktyor va rejissyor Anvar Salimov ijoddan tashqari to‘tiqushlar boqishga qiziqadi.

– Bir necha yildan buyon to‘tiqushlarning bir necha xil turlarini parvarishlayman. Hozircha uyimda 100 dan ortiq to‘tiqushlar bor. Kelajakda ularning turi va sonini yanada ko‘paytirish niyatim bor. Bu ketishda yaxshi to‘tishunos bo‘lib ketsam kerak, – deydi Anvar Salimov.

Rixsitilla Abdullayevda xumpardan tortib xongacha bor!

Foto: Instagram / @rixsitilla_abdullaev

Teatr va kino aktyori Rixsitilla Abdullayev ham xonadonida bir necha turdagi jonivorlarni parvarishlaydi.

Foto: Instagram / @rixsitilla_abdullaev

– Xon ismli zotdor itni kichikligidan buyon parvarishlayman. Qizlarimning iltimosiga ko‘ra o‘tgan yili mushuk ham olib berdim. Unga xumpar deb laqab qo‘ydik. It va mushuk bor hovliga birgina tovuq yetishmayapti deb bolalarimning bu iltimosini ham bajardim. Hozir uyimizda zotdor tovuq ham bor. U jo‘ja ochib, safini kengaytirishga urinyapti, – deydi aktyor.

Madina Mumtozning uyi hayvonot bog‘i edi!

Foto: Madina Mumtoz shaxsiy arxividan

“Nihol” nomidagi davlat mukofoti sovrindori Madina Mumtoz esa farzandlarining mehrli bo‘lib ulg‘ayishida jonivorlarning o‘rni katta deb hisoblaydi.

– Bolaligimdan jonivorlarni parvarishlashga qiziqaman. Shu kungacha it, mushuk, toshbaqa va  hatto, quyon ham pavarishlab ko‘rganman. O‘tgan yili yangi hovliga ko‘chib o‘tganimizdan keyin  bolalarim uchun mushukcha sotib oldik. Uni hovlidagi inida yashashga o‘rgatdik. Pepe ajoyib mushuk, – deydi Madina Mumtoz.

Bahora Arslonova chavandoz kelin!

Foto: Bahora Arslonovaning shaxsiy arxividan

Ilk marta ona bo‘lish arafasida turgan Bahora Arslonova esa otlarga juda qiziqadi.

– Bir necha yildan buyon ot sportiga qiziqaman, –  deydi u. –  Shu bois ota uyimdagi otni alohida mehr bilan parvarishlardim. Kelinlik xonadonimda ham ot-ulovlar bor. Ammo u yerga borganda, chavandozlik qilishga hijolat bo‘ldim.

Yulduz Usmonovaning “Nyusha”si

Foto: Instagram / @yulduzibragimovnausmonova

O‘zbek “primoddonnasi” Yulduz Usmonova ham xonadonida bir juft ona-bola zotdor mushukni parvarishlaydi. Yodingizda bo‘lsa, o‘tgan yilning oktyabr oyida ijtimoiy tarmoqlarda u Nyusha laqabli mushugi yo‘qolgani haqida xabar qoldirgan edi.

Kumushning mushugi oila a’zosidek qadrli!

Foto: Instagram / @gimandinova_official

“Qadam” serialidagi Kumush roli orqali tomoshabinlarga yaxshi tanish bo‘lgan aktrisa Kamila Gimandinova mushugisiz hayotini tasavvur etolmaydi. Uning ijimoiy tarmoqdagi “Buvim, otam va mushugim mening oilamdir” degan posti ko‘plab muhokamalarga sabab bo‘ldi.

Nilufar Usmonovaning Chichisi...

Foto: Instagram /@Nilufarusmonova

Xonanda Nilufar Usmonovaning Chichi ismli mushugi bor. Jonivor 2019-yil jarohati sabab jarrohlik amaliyotini ham boshidan o‘tkazgan. O‘sha vaqtda xonanda mushugining jarrohlik amaliyotidan keyingi suratini Instagram’dagi sahifasiga joylagandi.

Foto: Instagram / @niyozova_dildorahon

Foto: Instagram / @luiza_rasulova

Xonanda Dildora Niyozova va aktrisa Luiza Rasulovalar esa uylarida to‘tiqush boqishadi.

Manzuraning uyida bir emas, uchta mushugi bor. Umuman olganda, xonandaning mushuklarga mehri bo‘lakcha.

Foto: Instagram / @manzurasinger