Bangkokning Ekkamay tumanida restoranga tashrif buyuruvchilar uchun 45 yildan buyon mol go‘shtidan ragu taomi pishiriladi, deb xabar beradi “RIA Novosti”.
Nattapong Kaviantavong ota-onasidan keyin ham an’anani davom ettirgan holda “abadiy” taom tayyorlab kelmoqda. “Ko‘pchilik bizni hech qachon qozonni tozalamaydi, deb o‘ylaydi. Ammo unday emas, har kuni kechki payt ragu boshqa idishga olinadi va idishlar tozalab yuviladi. Shundan so‘ng sho‘rva bir kecha davomida qaynatishga qo‘yiladi”, − deydi u.
Ertangi tashrif buyuruvchilar uchun taom tuni bilan pishiriladi. Restoran mijozlariga manzur keluvchi ushbu taom 45 yildan buyon tayyorlanib kelmoqda. Sho‘rva tayyorlashning aniq bir retsepti yo‘q, undagi masalliqlar miqdorini sinab ko‘rish mumkin. Taomga o‘nlab xitoy o‘tlari, sarimsoq, dolchin, qora murch, kashnich ildizi va 70 kilogramm go‘sht qo‘shiladi. Mol go‘shti yumshoq bo‘lib pishishi va ziravorlar ta’mini olishi uchun taxminan 7 soat davomida qaynatiladi. Uch soat katta bo‘lak holida, taxminan 4 soat maydalangan shaklda.
Gavjum ko‘chaning piyodalar yo‘lakchasida turgan diametri 1,5 metr, chuqurligi 76 santimetr bo‘lgan katta qozon odamlarning e’tiborini tortadi. Mahalliy aholining ta’kidlashicha, ular bu taomning ta’mini bolaligidan buyon biladi. Taomning mazasi sira ham o‘zgarmagan. Bongkokka tashrif buyurgan ko‘plab xorijliklar, albatta, ushbu restoranda mehmon bo‘lmay ketmaydi. Shuningdek, professionallarning “abadiy sho‘rva”ga bergan bahosi sifatida restoran Mishlen yulduzi va boshqa nufuzli mukofotlar bilan ham taqdirlangan.
Izoh (0)