Ўзбек шоу-бизнеси вакилларининг ижтимоий тармоқлардаги саҳифасини кузатиб борадиган мухлислар уларнинг кўпчилиги уй ҳайвонларини боқишга қизиқишини яхши билади. Журналист Наргиза Муродова машҳурларнинг севимли жониворлари ҳақида маълумотлар тўплади.
Райҳон фарзандларига мушук совға қилолмайди!
Хонанда Райҳон бир неча йилдан буён онасининг Бен исмли зотдор итини парваришлайди.
– Ислом ва Имрон анчадан буён мушукча совға қилишимни сўрашади. Аммо ҳозирча бу истакларини амалга оширолмайман. Сабаби уйимизда раҳматли онамнинг севимли Бен лақабли ити бор. У анча қариб, кучсизланиб қолган. Аммо у барибир оиламиз учун жуда қадрли, – дейди хонанда Райҳон.
Ўтган йилнинг август ойида хонанда Instagram’даги профилига итининг йўқолиб қолгани ҳақидаги хабарни жойлаганди. Орадан бир неча кун ўтиб, Бен лақабли ит яхши инсонлар кўмагида топилганини маълум қилди.
Анвар Салимов: «Тўтишунос бўлмоқчиман!»
«Гап йўқ» ва «Маслаҳат» кўрсатувлари билан томошабинларга яхши таниш бўлган актёр ва режиссёр Анвар Салимов ижоддан ташқари тўтиқушлар боқишга қизиқади.
– Бир неча йилдан буён тўтиқушларнинг бир неча хил турларини парваришлайман. Ҳозирча уйимда 100 дан ортиқ тўтиқушлар бор. Келажакда уларнинг тури ва сонини янада кўпайтириш ниятим бор. Бу кетишда яхши тўтишунос бўлиб кетсам керак, – дейди Анвар Салимов.
Рихситилла Абдуллаевда хумпардан тортиб хонгача бор!
Театр ва кино актёри Рихситилла Абдуллаев ҳам хонадонида бир неча турдаги жониворларни парваришлайди.
– Хон исмли зотдор итни кичиклигидан буён парваришлайман. Қизларимнинг илтимосига кўра ўтган йили мушук ҳам олиб бердим. Унга хумпар деб лақаб қўйдик. Ит ва мушук бор ҳовлига биргина товуқ етишмаяпти деб болаларимнинг бу илтимосини ҳам бажардим. Ҳозир уйимизда зотдор товуқ ҳам бор. У жўжа очиб, сафини кенгайтиришга уриняпти, – дейди актёр.
Мадина Мумтознинг уйи ҳайвонот боғи эди!
«Ниҳол» номидаги давлат мукофоти совриндори Мадина Мумтоз эса фарзандларининг меҳрли бўлиб улғайишида жониворларнинг ўрни катта деб ҳисоблайди.
– Болалигимдан жониворларни парваришлашга қизиқаман. Шу кунгача ит, мушук, тошбақа ва ҳатто, қуён ҳам паваришлаб кўрганман. Ўтган йили янги ҳовлига кўчиб ўтганимиздан кейин болаларим учун мушукча сотиб олдик. Уни ҳовлидаги инида яшашга ўргатдик. Пепе ажойиб мушук, – дейди Мадина Мумтоз.
Баҳора Арслонова чавандоз келин!
Илк марта она бўлиш арафасида турган Баҳора Арслонова эса отларга жуда қизиқади.
– Бир неча йилдан буён от спортига қизиқаман, – дейди у. – Шу боис ота уйимдаги отни алоҳида меҳр билан парваришлардим. Келинлик хонадонимда ҳам от-уловлар бор. Аммо у ерга борганда, чавандозлик қилишга ҳижолат бўлдим.
Юлдуз Усмонованинг «Нюша»си
Ўзбек «примоддоннаси» Юлдуз Усмонова ҳам хонадонида бир жуфт она-бола зотдор мушукни парваришлайди. Ёдингизда бўлса, ўтган йилнинг октябр ойида ижтимоий тармоқларда у Нюша лақабли мушуги йўқолгани ҳақида хабар қолдирган эди.
Кумушнинг мушуги оила аъзосидек қадрли!
«Қадам» сериалидаги Кумуш роли орқали томошабинларга яхши таниш бўлган актриса Камила Гимандинова мушугисиз ҳаётини тасаввур этолмайди. Унинг ижимоий тармоқдаги «Бувим, отам ва мушугим менинг оиламдир» деган пости кўплаб муҳокамаларга сабаб бўлди.
Нилуфар Усмонованинг Чичиси...
Хонанда Нилуфар Усмонованинг Чичи исмли мушуги бор. Жонивор 2019 йил жароҳати сабаб жарроҳлик амалиётини ҳам бошидан ўтказган. Ўша вақтда хонанда мушугининг жарроҳлик амалиётидан кейинги суратини Instagram’даги саҳифасига жойлаганди.
Хонанда Дилдора Ниёзова ва актриса Луиза Расуловалар эса уйларида тўтиқуш боқишади.
Манзуранинг уйида бир эмас, учта мушуги бор. Умуман олганда, хонанданинг мушукларга меҳри бўлакча.
Изоҳ (0)