AQSh Xalqaro taraqqiyot moliya korporatsiyasi (DFC) O‘zbekiston Ibrohim jamg‘armasini qo‘llab-quvvatlashini ma’lum qildi. Bu haqda AQShning O‘zbekistondagi elchixonasi matbuot xizmati xabar berdi.
Ushbu jamg‘arma AQSh, Isroil va Birlashgan Arab Amirliklari tomonidan 2020-yil 20-oktabrda ochilgan. Jamg‘arma orqali uch mamlakat mintaqaviy iqtisodiy hamkorlikni rivojlantirishga qaratilgan xususiy sektor boshchiligida amalga oshiriluvchi sarmoyalar va taraqqiyot tashabbuslari uchun 3 milliard dollardan ortiq mablag‘ sarflashni ko‘zlaydi.
O‘zbekiston iqtisodiy hamkorlik va aloqalarni yaxshilash uchun jamg‘armaga 50 million dollargacha mablag‘ ajratadi.
“Biz O‘zbekistonning Ibrohim jamg‘armasini qo‘llab-quvvatlashi mamlakatlarimizning mintaqaviy hamkorlikni rivojlantirishga bo‘lgan sadoqatining ajoyib namunasi bo‘ladi hamda mintaqada qashshoqlikni kamaytirish, unumdorlik va ish bilan ta’minlashni kuchaytirish, iqtisodiy o‘sishda muhim rol o‘ynaydi, deb umid qilamiz”,— degan bosh vazir o‘rinbosari, Investitsiyalar va tashqi savdo vaziri Sardor Umurzoqov.
“Biz O‘zbekiston bilan tobora o‘sib borayotgan sherikchilikdan faxrlanamiz hamda uning Ibrohim jamg‘armasini qo‘llab-quvvatlashini umumiy maqsadlarimizni kengaytirish yo‘lidagi muhim qadam deb bilamiz”, — degan DFC bosh ijrochi direktori Adam Boler.
Eslatib o‘tamiz, AQSh, O‘zbekiston va Qozog‘iston hukumatlari 7-yanvar kuni “Markaziy Osiyo investitsiyaviy sherikligi” tashabbusi yo‘lga qo‘yilishi haqida ma’lum qildi. Mamlakatlar xususiy sektor o‘sishiga hamda iqtisodiy aloqalarni kengaytirishga xizmat qiladigan loyihalarni qo‘llab-quvvatlash uchun besh yil ichida kamida 1 milliard dollar mablag‘ jalb etish niyatida. DFC rahbari Adam Boler ushbu tashabbusni rasman ishga tushirish maqsadida Toshkentga tashrif buyurdi.
Izoh (0)