UFC jangchisi Irvin Rivera (10-6) o‘zining opa-singlisini o‘ldirishga uringanlik uchun hibsga olindi, deya xabar qilmoqda CBS Sports.

Foto: Instagram

Politsiya hisobotiga ko‘ra, qo‘shnilar eshik taqillashidan keyin uyg‘onib ketgan va ayol ovozini eshitgan: “U meni o‘ldirmoqchi. Iltimos, singlimga yordam bering”. Qonga botgan Rivera qo‘shnilariga hammasi joyida ekanini aytgan va eshikni yopgan. Shundan keyin u qochib ketgan.

22 yoshli singil bel, bosh va qo‘lidan pichoq jarohatini olgan. Opa-singillarning kattasida esa yuz, bel, qo‘l, kaft va o‘pkasida jarohatlar aniqlangan. Opa-singillar tezda shifoxonaga yetkazilgan, ulardan birining holati yaxshi, boshqasiniki esa og‘ir.

Politsiya Riverani qo‘lga olishga muvaffaq bo‘lgan. Sportchi ikki ayolni o‘lgan deb o‘ylagan. Tergov jarayonida Rivera o‘z aybini tan olgan. Yakkakurashchiga qotillikka urinish aybi qo‘yilgan, hozirda qamoqda saqlanmoqda.

Rivera 2020-yilning may oyida UFC’da debyut qilgan va dastlabki jangida mag‘lub bo‘lgandi. Keyinchalik u avgust va sentabr oylarida yana oktagonga ko‘tarildi va ularda bittadan g‘alaba hamda mag‘lubiyat qayd etdi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!