O‘zbekistonda so‘nggi 10 kundan beri anomal sovuq havo kuzatilmoqda, mamlakatda bunday qahraton so‘nggi yillarda kuzatilmagan edi. Bu haqda “O‘zgidromet” vakili Malohat Ro‘ziyeva “Kun.uz”ga bergan intervyusida aytib o‘tdi.

Foto: Madina Nurman / “Daryo”

Ta’kidlanishicha, O‘zbekistonda so‘nggi 10 kunda beri kuzatilayotgan sezilarli sovuq ob-havoni Sibirdagi sovuq antitsiklon periferiyasi belgilab turibdi. Bunda juda yuqori bosimli maydon anomal sovuq havoni olib kelgan.

“Bu vaqtda kechalari -10...-5, shimol va cho‘l zonalarida -17...-12 darajagacha sovuq harorat qayd etilyapti. Kunduzlari -5…0 daraja sovuq kuzatilyapti. Bu o‘rtacha ko‘p yillik qiymatlardan 10—12 daraja past. O‘rtacha ko‘rsatkichlardan past havo harorati uzluksiz 10 kun davom etayotgani uchun bu anomal hisoblanadi”, — dedi “O‘zgidromet” vakili.

Malohat Ro‘ziyevaning qayd etishicha, O‘zbekistonda yanvarda bunday sovuq, ya’ni 10—12 daraja past havoning kuzatilishi oldingi yillarda ham kuzatilgan, biroq “bu qadar davomiy bo‘lmagan”.

“Masalan, 2014-yil yanvar oyining 11 kunida 6—8 daraja sovuq kuzatilgan. 2008-yilda esa umumiy yanvar oyida harorat o‘rtacha me’yordan 7 daraja past bo‘lgan. 2012-yilda qisqa muddatli sovuqlar kuzatilgan. Bizda hozirgi kunda kuzatilayotgan darajadagi sovuqlar oxirgi 10 yilda qayd etilmagan. Ya’ni hozirgiday davomli, qor parchalari kristallashgan, bulduruqli havo kuzatilmagan. Shuning uchun ham anomal sovuq dedik”, — dedi u.