Ijtimoiy tarmoqlarda ichki ishlar organlari xodimlari va bir guruh fuqarolar o‘rtasida yuz bergan mojaro videosi tarqaldi. IIV Yo‘l harakati xavfsizligi bosh boshqarmasi (YHXBB) matbuot xizmati xabariga ko‘ra, voqea 1-yanvarga o‘tar kechasi soat 4:00 atrofida Toshkentning Qatortol ko‘chasida sodir bo‘lgan.
Videoda ichki ishlar organlariga tegishli xizmat avtomobili fuqaroning Matiz’ini Qatortol—Cho‘ponota ko‘chalari kesishmasi yaqinidagi eski qabriston devoriga siqib qo‘yganini va shu joyda janjal bo‘layotganini ko‘rish mumkin. Shu vaqt yo‘l-patrul xizmati (YPX)ning yangi namunadagi libosida bo‘lgan xodim yugurib chiqib, piyodalar yo‘lagida ketayotgan fuqaroni ura boshlagan.
Fuqaro bunga javoban YPX xodimiga qarshi kuch ishlatgan, bu orada mushtlashuvga boshqa fuqarolar va patrul-post xizmati (PPX) xodimi ham qo‘shilgan; mojaro davomida PPX xodimi kaltak yegan va shundan so‘ng o‘qotar quroliga yopishib, fuqarolarga qarshi ishlatmoqchi bo‘lgan, biroq uni yonidagi YPX xodimi: “To‘xtang! Otmang”, deb bu niyatidan qaytargan.
YHXBB matbuot xizmatining aniqlik kiritishicha, mojaro Matiz haydovchisi Muqimiy ko‘chasida YPX xodimining to‘xtash ishorasiga bo‘ysunmay, qochganidan boshlangan. Bosh boshqarmaning alohida qayd etishicha, Matiz Qatortol ko‘chasida boshqaruvni yo‘qotib, beton to‘siq (bordyur) ustiga chiqib to‘xtagan.
“Mashinada bo‘lgan to‘rt fuqaro hodisa joyiga yetib kelgan YPX va PPX xodimlarining qonuniy talablarini bajarmay, o‘tkir tig‘li jismlar bilan qarshilik ko‘rsatgan. Fuqarolardan biri ushlanib, Chilonzor IIBga olib kelingan, qolgan uch nafari hodisa joyidan yashiringan”, — deyiladi YHXBB axborotida.
Qo‘shimcha qilinishicha, hozirda hodisada qatnashgan barcha fuqarolar shaxsiga aniqlik kiritilgan, Chilonzor prokuraturasi tomonidan Jinoyat kodeksining 227-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakiliga qarshilik ko‘rsatib sodir etilgan bezorilik) bilan jinoyat ishi qo‘zg‘atilgan, dastlabki tergov harakatlari olib borilmoqda.
IIV YHXBBning axborotida YPX xodimi nima uchun piyodalar yo‘lkasidan ketayotgan fuqaroga tashlanib, uni urganiga aniqlik kiritilmagan. Shuningdek, PPX xodimining o‘qotar quroldan foydalanishga uringani holatiga ham baho berilmagan.
Izoh (0)