Qashqadaryo viloyati Koson tumanida 25 ta mahalla Yangi yil bayramini elektr tokisiz kutib oldi

Qashqadaryo viloyatining Koson tumanida 25 ta mahalla aholisi Yangi yil bayramini elektr tokisiz, sham yorug‘ida kutib olgan. Tumanda 31-dekabr kuni kechki payt 21:14 da o‘chgan chiroq 1-yanvar soat 17:00 ga qadar ham qayta yonmagan, deya xabar berdi “Daryo” muxbiri.

Mazkur voqea tafsilotini aniqlashtirgan Koson tuman hokimligi axborot xizmatining yozishicha, Yangi yil bayrami kuni yuzaga kelgan nosozlikni bartaraf etish uchun barcha kuch safarbar etilgan. Ammo eplay olmagan. Tumandagi asosiy podstansiya Koson 110\35 \10 KVdagi nosozlik sabab hududdagi 25 ta mahalla ahli Yangi yil bayramini sham yorug‘ida kutib olishga majbur bo‘lgan.

Ma’lumot berilishicha, ta’mirlash ishlariga “Qashqadaryo hududiy elektr tarmoqlari” AJdan 25 nafardan ortiq, Koson tuman elektr ta’minoti korxonasidan 20 nafar xodim safarbar qilingan. Biroq muammo 2021-yil 1-yanvar kuni soat 17:00 ga qadar ham bartaraf etilmagan.

Vaziyatga munosabat bildirgan “Qashqadaryo hududiy elektr tarmoqlari” AJ axborot xizmati Kosondagi elektr o‘chishi 2020-yil 31-dekabr kuni soat 21:14 da sodir bo‘lganini, bunga sabab esa Koson podstansiyasidan chiquvchi shahar-1 fiderining bosh kabelidagi shikastlanish ekanligini ma’lum qildi.

“Natijada Koson tumanining Nartibaland, Nartichuqur, Lolazor, Do‘stlik, Mesit MFYlari hududida elektr ta’minotida uzilishlar kuzatilgan. ‘Qashqadaryo hududiy elektr tarmoqlari’ AJ texnik direktori boshchiligida jamiyatning tegishli bo‘lim, xizmat va tuman elektr ta’minoti korxonasi mutaxassislari zudlik bilan voqea joyiga yetib borib, avariya oqibatlarini bartaraf etish ishlarini olib borishmoqda”, — deyiladi mas’ullar munosabatida.

Qashqadaryolik bloger Javohir Baxtiyorovning “Daryo”ga ma’lumot berishicha, G‘uzor tumanining Tojik qishlog‘ida 2021-yil 02:00 da o‘chgan elektr toki 2021-yil 17:00 ga qadar ham yonmagan. G‘uzor tumanining “Amir Temur” mahallasida esa Yangi yil oqshomida to‘rt-besh marotaba o‘chgan chiroq 2021-yil 1-yanvar kuni uch soat yonmagan.

Viloyatda faoliyat yurituvchi bloger Otabek Artikov Yangi yilni chiroqsiz kutib olgan kosonliklar haqida so‘z yuritib, “Siz yashaydigan hududda ham ‘svet’ o‘chdimi, so‘kinishga shoshilmang. Demak, kimdir sizga romantik oqshom hadya qilmoqchi”, deya kesatadi.

Eslatib o‘tamiz, viloyat hokimi Zoir Mirzayev viloyatda elektr ta’minoti soatlab rejasiz uzilayotgani ustidan bosh vazir Abdulla Aripovga shikoyat qilgandi. Bosh vazir vaziyat ikki kunda o‘nglanishini va’da bergandi.