Qashshoqlikdan qamoqxonagacha: futbol sehrgari Ronaldinyoning hayoti va faoliyati haqida

Ronaldinyo — millionlab muxlislarning yoqimtoyi va ko‘plab qalblar zabt etuvchisi hisoblanadi. U yashil maydonda shunday sehrgarliklarni amalga oshirardiki, unga mahliyo bo‘lmaslikning imoni yo‘q edi. Aynan uning g‘ayrioddiy o‘yini kishilarni futbolni yanada sevishga va ishonchim komilki, u bilan shug‘ullanishga majbur qilgan. Biroq afsona bugun maydondan ancha yiroqda va hatto, afsuski, qamalib chiqishga ham ulgurdi. Quyida futbol sehrgarining hayot yo‘li va faoliyati haqida hikoya qilib beramiz.

Qashshoqlik

Ronaldinyo 1980-yilning 21-mart sanasida Braziliyaning Portu-Alegri shahrida tavallud topgan. Onasi sotuvchilik qilsa, otasi kunduzi qayiqlarni tuzatar, tunda esa avtoturargohda qorovullik qilib oilasini ta’minlashga harakat qilardi. Roni esa bolaligidan millionlar o‘yiniga alohida mehr qo‘ygandi, ko‘plab braziliyalik bolalar singari unda ham futboldan boshqa najot bo‘lmagan.

Millionlar o‘yinidagi ilk qadamlar

Braziliyalik 7 yoshida “Lanjendonk” futbol akademiyasida shug‘ullana boshlaydi. Aynan o‘sha yerda unga Ronaldinyo (“kichkintoy Ronaldo”) laqabi beriladi. Boisi u tengqurlari orasida eng jussasi kichigi edi. Bolakay hech qachon to‘pdan ajralmasdi va hatto og‘ir mashg‘ulotlardan keyin ham o‘z ustida ishlashda davom etaverardi.

Roni haqidagi ilk shov-shuvlar

1993-yilda, 13 yoshida Ronaldinyo nomi ilk marta gazetada tilga olinadi. O‘sha kuni Ronaldinyo jamoasi raqibni 23:0 hisobida mag‘lubiyatga uchratadi, uchrashuvdagi gollarning barchasi esa sezib ulgurganingizdek, qahramonimiz tomonidan uriladi.

Professional faoliyatning boshlanishi

Yigitcha o‘zining birinchi professional shartnomasini 1997-yilda “Gremio” klubi bilan imzolaydi. Mazkur jamoa tarkibida Ronaldinyo 35 ta uchrashuvda maydonga tushib, 14 ta gol uradi.

2001-yilda esa Ronaldinyoni PSJ o‘z safiga qo‘shib oladi. Parijda o‘tkazilgan ikki mavsumni yetarli darajada ajoyib o‘tkazgan va Fransiyadagi oxirgi birinchilikda PSJning eng yaxshi to‘purari bo‘lgan Ronaldinyoning navbatdagi manzili “Barselona” bo‘ladi.

“Barselona”ga o‘tish, shubhasiz, uning faoliyatidagi eng yaxshi bosqich hisoblanadi. Aynan “ko‘k-anorranglilar” safida Ronaldinyo o‘zining nimalarga qodir ekanligini namoyish yetadi va Yevropa hamda jahonning eng yaxshi o‘yinchisi nomini qo‘lga kiritadi. Futbol muxlislari esa hamon uning “Barselona” safidagi o‘yinlarini entikib qo‘msaydi.

Vaqt o‘tishi bilan Ronaldinyo yulduzlarga xos betartib hayot tarzini olib borishni boshlaydi: spirtli ichimliklar, taqiqlangan moddalar va hokazolar. Albatta, bularning barchasi “sehrgar”ga-da ta’sir etmay qolmaydi va uning o‘yinida pasayish kuzatiladi. Yakunda u boshqa klubga o‘tishga majbur bo‘ladi.

Futbolchining keyingi to‘xtash joyi “Milan” klubi bo‘ldi. Hayotdagi bir qancha qiyinchiliklar va jismoniy tayyorgarlik bilan bog‘liq muammolarga qaramay, Roni o‘z saviyasini Apenin yarimorolida ham ko‘rsata oladi. Roni A Seriyaning eng yaxshi assistenti va Italiya chempioniga aylanadi.

Afsonaning so‘nishi

2011-yilda Ronaldinyo vatani Braziliyaga qaytadi va naq 4 ta klub sharafini himoya qiladi: “Flamengo”, “Atletiko Mineyro”, “Keretaro” va “Fluminense”. 2015-yilda esa millionlarning suyuklisi katta futbol bilan xayrlashadi. Ha, futbol shunday beshafqat o‘yin, bugun yulduzsan, ertaga shunchaki unutilasan, sening o‘rningga esa yangidan yangi yulduzlar paydo bo‘laveradi.

Futboldagi mahorat

Ronaldinyo maydonda harakatlanar ekan, go‘yo uning kamchiligi yo‘qdek taassurot uyg‘onardi. Ammo uning eng ustun jihati — to‘p bilan qanday harakat qilishi edi. Tan olish lozim, dribling bobida unga teng keladigani yo‘q.

Shuningdek, futbolchi jarima to‘plarini mukammal darajada amalga oshirardi hamda turgan joyidan kuchli va aniq zarba bera olardi.

Qamoq

2020-yilning 5-mart kuni Ronaldinyo “Kamp Nou”da yulduzlar ishtirokidagi o‘yinda ishtirok etishi kerak edi. Ammo barchasi kutilmagan yakun topdi, futbolchi hujjatlarini qalbakilashtirgan holda Paragvay chegarani kesib o‘tishga uringanlikda ayblandi va hibsga olindi. 32 kunni mahbuslar orasida o‘tkazgan Ronaldinyo u yerda ham futbol o‘ynab, qamoqxona chempionligini tantana qildi. Final o‘yinida esa braziliyalikning jamoasi raqiblarini 11:2 hisobida mag‘lubiyatga uchratdi. Ronaldinyo o‘z hisobiga 5 ta gol va 6 ta golli uzatma yozdirib qo‘ydi.