Ba’zida bolalar uxlashni istamaydi. Bunga sabab qorong‘ilikdan qo‘rqish, yotoq ostidagi “maxluqlar”, yoki shunchaki kun tugashini xohlamaslik bo‘lishi mumkin. Quyida bolaning tezroq va yengilroq uxlashiga yordam beradigan sodda usullar bilan tanishing.
Yostiq va adyolga lavanda spreyi sepish
Lavanda tinchlantiruvchi va dam beruvchi xususiyatga ega. Uning moyi uyquga tez kirishga yordam beradi. Tayyor spreyni do‘kondan sotib olishingiz mumkin, lekin o‘zingiz ham tayyorlasangiz bo‘ladi. Yarim stakandan biroz kamroq suvga 15 tomchi lavanda moyi qo‘shing. Shundan keyin uni purkagichli idishga solib, har kecha yostiq, adyol yoki bola yotadigan o‘yinchoqlarga seping. Faqat ishlatishdan oldin idishni chayqatishni unutmang.
Eslatma: 2 yoshgacha bo‘lgan bolalarda lavanda moylariga allergiya bo‘lishi mumkin. Shuning uchun avval shifokor bilan maslahatlashing.
Bolaga yengil massaj qilish
Tadqiqotlarga ko‘ra, bolani har kuni kechqurun 15 daqiqa massaj qilsa, u tezroq uxlaydi va chuqur uyquga ketadi. Ayniqsa, 1,5 yoshgacha bo‘lgan bolalarda bu usul samarali.
Massaj bolaning asab tizimini tinchlantiradi, stress gormoni kortizolni kamaytiradi, baxt gormonini chiqarishga yordam beradi. Bundan tashqari, u ota-ona va bola orasidagi yaqinlikni oshiradi.
Massajni qo‘l va oyoqlardan boshlang, so‘ng qorin, bel va eng oxirida yuzni muloyim harakatlar bilan massaj qiling.
Uyqudan oldin ijodiy mashg‘ulotlar
Rassomchilik, bo‘yash yoki ertak o‘ylab topish — bularning hammasi bolani tinchlantiradi. Bola yotishdan oldin rasm chizishi yoki siz bilan kichik spektakl o‘yinini o‘ynashi mumkin. Bunda bola kun davomida yig‘ilgan hissiyotlarini chiqaradi va uyquga tayyor bo‘ladi. Yaxshisi, fon uchun sekin musiqa qo‘ying va bolaga yumshoq qalamlar bering.
Bola bilan gaplashish
Ba’zida uxlashga majbur qilish o‘rniga, oddiygina suhbat foydaliroq bo‘ladi. Undan so‘rang: kuni qanday o‘tdi, nima haqida o‘ylayapti, tushida nimani ko‘rdi. O‘zingiz ham kun davomida sizni quvontirgan yoki xafa qilgan voqealar haqida aytib bering. Bu bolaning o‘zini xavfsiz his qilishiga yordam beradi. Gaplashayotganda qo‘lidan ushlang yoki quchoqlang.
Aktiv o‘yin o‘ynash
Mashhur shifokor Loran Kantrell bolasi bilan “Aravacha” o‘yinini o‘ynaydi. Bolaning oyog‘idan ushlab, qo‘llarida yurgizadi. Bu o‘yin nafaqat kulgili, balki asab tizimini tinchlantiruvchi mashq ham hisoblanadi. Bu usul 3 yoshdan katta bolalar uchun mos.
Tana harakati miyaga kuchli signal yuboradi va bolani tezroq dam olish holatiga olib keladi.
To‘g‘ri musiqa tanlash
Tinch, sekin ritmdagi musiqa bolani tezroq uxlatadi. Masalan, klassik qo‘shiqlar, tabiat tovushlari yoki oddiy instrumental kuylar foydali. Har kuni bir xil musiqani qo‘yish tavsiya qilinadi — bu bolada xavfsizlik hissini uyg‘otadi.
Ammo esda tuting: har bir bolaning o‘z didi bo‘ladi. Ba’zilar Motsartni yoqtirsa, boshqalar Chalantano ostida uxlaydi. Eng yaxshi maslahat — bolangizning o‘zini tinglash.
Eng yaxshi maslahatchilar bu o‘z farzandlarini yaxshi biladigan ota-onalar. Siz ham bolangizga nima yaxshi ta’sir qilishini tajriba qilib, bilib olasiz.
Izoh (0)