Sirdaryoda 1,5 yoshli bolasini 17 ming dollarga sotgan onaga hukm o‘qildi

Sirdaryo viloyatida 1,5 yoshli farzandini 17 ming AQSh dollariga sotgan ona qo‘lga olindi, deya xabar bermoqda O‘zA.

Ma’lum qilinishicha, sirdaryolik A.O‘rinboyeva 2020-yilning iyul oyida o‘z hamshahari X.Mamatqulov bilan tanishib, hozirda sharoiti og‘irligi va moddiy tomondan qiynalganligi sababli pul kerakligini, buning evaziga o‘z farzandi — 2019-yil 12-iyulda tug‘ilgan L.O‘rinboyevani 17 ming AQSh dollariga sotishini aytadi.

X.Mamatqulov bu haqda Departamentning Sirdaryo viloyati hamda viloyat ichki ishlar boshqarmalariga ariza bilan murojaat qiladi.

Qayd etilishicha, 2020-yilning 21-iyul kuni kunduzi soat 12:00 lar atrofida uning arizasiga asosan Departamentning viloyat boshqarmasi va Sirdaryo viloyat IIB xodimlari bilan hamkorlikda Guliston shahar 2-mavze “Namuna” mahallasida joylashgan “Zomin” to‘yxonasining yonidagi qurilishi tugallanmagan binoning yonida tezkor tadbir o‘tkazilgan.

Unda A.O‘rinboyeva o‘zining 2019-yil 12-iyulda tug‘ilgan farzandi L.O‘rinboyeva voyaga yetmagan va ojiz ahvoldaligini bila turib, uni “maxsus xaridor”ga 17 ming AQSh dollariga sotayotganda qo‘lga olingan.

Sud mazkur jinoyat ishini ko‘rib chiqib, A.O‘rinboyevani Jinoyat kodeksining 135-moddasi 3-qismi “a” bandi (o‘n sakkiz yoshga to‘lmaganligi aybdorga ayon bo‘lgan shaxs oldi-sotdisi — odam savdosi) bilan aybdor deb topdi va unga Jinoyat kodeksining 57-moddasi (yengilroq jazo tayinlash) qo‘llanilib, 5 yil ozodlikdan mahrum qilish jazosini tayinladi.

Avvalroq Sirdaryoda to‘rt kunlik chaqalog‘ini 20 ming dollarga sotayotgan ayol, Xivada 4 oylik qizini 120 million so‘mga sotmoqchi bo‘lgan ayol hamda Namanganda 6 oylik chaqalog‘ini 1,9 million so‘mga sotib yuborgan turmushga chiqmagan ayol qo‘lga olingani haqida xabar berilgandi.