Samarqandda Lacetti daraxtga urilishi oqibatida yo‘lovchi halok bo‘ldi
Samarqandda Lacetti katta tezlikda daraxtga urilishi oqibatida bir kishi halok bo‘ldi, deya xabar qilmoqda YHXBB.
Qayd etilishicha, 2020-yil 5-dekabr kuni ertalab soat 4:00 lar atrofida Samarqand shahar Gagarin ko‘chasi 2-oilaviy poliklinika ro‘parasida yo‘l-transport hodisasi sodir bo‘lgan.
Unga ko‘ra, Lacetti rusumli avtomashina tezlikni me’yoridan oshirishi natijasida yo‘lning ikki tomonlama ajratib turuvchi beton to‘siq orasidagi chinorga kelib urilgan.
Oqibatda mashina ichidagi yo‘lovchi voqea joyida vafot etgan, haydovchi esa olgan tan jarohatlari sabab shifoxonaga yotqizilgan. Holat yuzasidan mutasaddilar voqea joyiga hodisa sabablarini o‘rganish maqsadida yetib kelgan.
Avvalroq Farg‘onada Nexia kelib urgan Damas haydovchisi shifoxonada vafot etgani, Surxondaryoda mast haydovchi boshqaruvidagi Nexia-3 daraxtga borib urilishi oqibatida 2 kishi halok bo‘lgani hamda Oqdaryoda tanishining Lacetti’sini olib qochgan mast haydovchi beton to‘siqni buzib o‘tgani haqida xabar berilgandi.
