Samarqand viloyati Urgut tumanida Lacetti avtomashinasi yo‘ldan o‘tayotgan maktab o‘quvchisini urib yubordi, deya xabar bermoqda YHXBB.
Qayd etilishicha, 2020-yil 3-dekabr kuni Urgut tumani “A’loxotin” mahalla fuqarolari yig‘ini hududidan o‘tuvchi 4R-50 avtomobil yo‘lining 20-kilometrida Urgut tumani “Algar” mahallasida yashovchi 28 yoshli fuqaro boshqaruvida bo‘lgan Lacetti avtomobili bilan yo‘lni kesib o‘tayotgan 16 yoshli qizni urib yuborib, yo‘l-transport hodisasi sodir qilgan.
Oqibatda piyoda Urgut tumani markaziy shifoxonasida vafot etgan.
Hodisa sababi o‘rganilganda yo‘lning to‘liq talabga javob bermasligi, piyoda yo‘laklari, yo‘l chiziqlari chizilmagani aniqlangan. Shuningdek, hodisaga piyoda yo‘lning belgilanmagan qismidan kesib o‘tgani hamda haydovchining belgilanganidan ko‘ra yuqori tezlikda harakat qilgani sabab bo‘lgan.
Avvalroq Farg‘onada Nexia kelib urgan Damas haydovchisi shifoxonada vafot etgani, Surxondaryoda mast haydovchi boshqaruvidagi Nexia-3 daraxtga borib urilishi oqibatida 2 kishi halok bo‘lgani hamda Sergelida Cobalt urib ketishi oqibatida 10 yoshli bola vafot etgani haqida xabar berilgandi.
Izoh (0)