2020-yilning 25-noyabr sanasida futbol tarixidagi eng yorqin vakillardan biri Diyego Maradona bu yorug‘ olam bilan vidolashdi. Ushbu xabarni eshitgan futbolga aloqasi bo‘lgan inson borki, o‘zida o‘zgacha bir hissiyotni boshdan o‘tkazdi va xo‘rsinibgina qo‘ydi. Ha, Maradonani futbol olami xurmacha qiliqlariga qaramay, sevardi va ardoqlardi. Bunga esa yetarlicha sabablar bo‘lgan: aytishlaricha, futbol uch dahoni tan olar ekan. Ulardan biri “Tilla bola” laqabli Maradona ham edi. Hatto bir vaqtlar kimsan Messiga ham ikkinchi Maradona nomi berilgandi. “Daryo” quyida afsonaning eng mashhur iqtiboslarini taqdim etadi.
Foto: Getty Images
Onasi haqida
“Onam meni eng zo‘ri deb hisoblaydi. Men esa hech qachon onam bilan bahslashmayman”.
Futbol haqida
“To‘pni kir qilib qo‘yishdan qo‘rqmang”.
“Xudo menga yaxshi o‘ynash qobiliyatini berdi. Shuning uchun har doim maydonga chiqqanimda unga imon keltiraman. Agar men buni qilmasam, xuddi unga xiyonat qilayotgandek bo‘laman”.
“Hozir ko‘plab ingliz futbolchilari o‘z klublarida yetakchi, ammo ular o‘z mamlakati termasida yetakchi emas. Buni esa tushuntirish qiyin”.
“Murabbiylar hech qachon g‘alaba qozonishmaydi, xoh u Maradona bo‘lsin xoh Menotti yoki Bilardo. Faqat futbolchilar haqiqiy g‘olib hisoblanadi”.
“Menga odamlarning meni qanday murabbiy sifatida ko‘rishi muhim emas. Menda 23 futbolchi bor va men ular bilan birga o‘lishga ham tayyorman”.
Angliya terma jamoasi darvozasiga urgan goli haqida:
“Bu golning bir qismi Maradonaning boshi, ikkinchi qismi esa xudoning qo‘liga tegishli”.
Hayot haqida
“O‘zgacha turmush tarzi hayotimning bir qismi edi. Biroq hozir bunday emasman”.
“O‘g‘rini talon-toroj qilgan har qanday kishi kechirilishga loyiqdir”.
“Xudo faqat o‘ziga yordam beradigan insonlargagina madad beradi”.
Mashhurligi haqida
“Men ma’lum darajada siyosatchilardan ustunman, chunki ular jamoat odamlari, men esa shunchaki mashhurman”.
“Argentina — bu men”.
Karikatura: Goal
“Men qizlarim uchun haqiqiy qahramonman, shuning o‘zi men uchun yetarli”.
Yashash tarzi haqida
“Men aktyorman. Chunki men o‘zim xohlaganimcha yashayman. Ya’ni, aktyorlarga ssenariy beriladi va ular buni ijro etadi. Xo‘sh, men ijro etamanmi? Yo‘q, men shunchaki yashayman va bu mening rolim”.
Hazillar haqida
“Qo‘pol hazillar? Men u bilan oziqlanaman”.
Pele haqida
“Pele va meni taqqoslashdan foyda yo‘q. Chunki men zo‘rman”.
Giyohvand moddalar haqida
“Giyohvand moddalar meni eng muhim narsa — qizimning ulg‘ayishini ko‘rishdan mahrum qilgan va bu uchun o‘zimni hech qachon kechirmayman”.
Muvaffaqiyat haqida
“Odamlar muvaffaqiyatga mehnat orqali erishadi, omadning esa bunga hech qanday daxli yo‘q”.
