Bayden tarixda birinchi bo‘lib AQSh prezidenti saylovida 80 milliondan ortiq ovoz to‘pladi
Jo Bayden saylovda 80 milliondan ortiq ovoz to‘plagan tarixdagi birinchi AQSh prezidentligiga nomzodga aylandi. Mamlakatdagi yirik telekanallar, shu jumladan, NBC, CNN va Fox News keltirib o‘tgan, hali davom etayotgan ovozlarni hisoblash natijalari guvohlik bermoqda, deb yozadi Meduza.
Ayni paytgacha, NBC ma’lumotlariga ko‘ra, demokratga 80 million 20 ming kishi ovoz bergan, amaldagi prezident Donald Trampga — 73 million 886 ming kishi. Shu tariqa, Bayden 306 nafar saylovchi (saylov hay’ati a’zosi)ning ovoziga umid qilishi mumkin, saylovlarda g‘olib chiqish uchun esa 270 ta ovoz zarur. Trampda ayni paytda 232 saylovchining ovozi bor.
Saylovchilar bergan ovozlar soni bo‘yicha bundan avvalgi rekord Barak Obamaga tegishli edi, unga 2008-yilgi saylovlarda 69,4 million amerikalik ovoz bergan.
Avvalroq Donald Tramp ma’muriyati Jo Baydenga hokimiyatni topshirishga tayyorligini bildirgan edi. Shundan keyin Bayden o‘z ma’muriyatining asosiy a’zolarini shaxsan tanishtirdi. Shuningdek, demokrat Jozef Baydenga razvedka tomonidan davlat rahbari uchun tayyorlanadigan kunlik maxfiy hisobotlarni taqdim etishga ruxsat berildi.
Eslatib o‘tamiz, AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi va saylov bo‘yicha sudga murojaat qilishini bildirdi. U saylovlar qonunbuzarliklar bilan o‘tgan degan fikrda, shuningdek, saylovlarda mamlakat konstitutsiyasi buzilganini aytgan.
