Toshkent shahrida 18-noyabr kuni yog‘gan kuchli qor sababli poytaxt yo‘llarida yuzaga kelgan murakkab vaziyatni bartaraf etish uchun shaharning bir qator xizmatlari safarbar qilindi. Bu haqda “Kun.uz” xabar berdi.
Qayd etilishicha, Toshkent ko‘chalarida avtomobilda harakatlanish haqiqiy sinovga aylanib, ko‘chalar tirbandliklarga to‘lgan, yo‘l-transport hodisalari karrasiga oshgan, yo‘llar yaxmalakka aylangan paytda poytaxt kommunal xizmatlari ham o‘ziga xos imtihondan o‘tdi.
Nashrning yozishicha, barcha kuchlar mavjud vaziyat oqibatlarini bartaraf etishga safarbar qilindi. Yo‘llarga qum sepildi, eng katta tirbandliklar, avariyalar kuzatilgan hududlarga yordam kuchlari yetkazildi. Hamma uxlaganda, aksariyat avtomobillar manziliga yetib borganda ham ish to‘xtamadi.
Poytaxtda faoliyat yurituvchi quyidagi tashkilotlar o‘zlarining eng xodimlari bilan bu jarayonda ishtirok etdi:
- Obodonlashtirish bosh boshqarmasi;
- “Maxsustrans” DUK;
- “Toshissiqquvvati” DUK;
- Toshkent shahar suv ta’minoti korxonasi;
- Toshkent issiqlik markazi;
- “Toshshaharnur” DUK;
- “Poytaxtgaz”;
- Elektr tarmoqlari korxonasi;
- Tuman hokimliklari kommunal xizmat ko‘rsatish xodimlari;
- Transport boshqarmasi;
- Toshkent shahar kanal va ularga tutash hududlarni obodonlashtirish boshqarmasi;
- Shahar sun’iy inshootlardan foydalanish boshqarmasi;
- Markaziy maydonlarni obodonlashtirishga ixtisoslashgan boshqarma.
Favqulodda vaziyatlar vazirligi O‘zbekistonda 18-noyabr kuni boshlangan noqulay ob-havo sharoiti 20-noyabrga qadar davom etishi kutilayotganini ma’lum qilgandi. “O‘zgidromet” sinoptiklari esa O‘zbekistonda izg‘irin sovuq kelasi hafta boshigacha saqlanib qolishini bildirdi.
Izoh (0)