“O‘zgidromet” sinoptiklari 18-noyabr kuni kuzatilgan ob-havo haqida izoh berdi, deb xabar bermoqda “Gazeta.uz”. Mamlakatga qor va ayozni Ural hududlaridan kelgan sovuq antisiklon olib keldi.

Foto: “Daryo”

O‘zbekiston hududining katta qismida, asosan, qor shaklidagi yog‘ingarchilik bo‘lib o‘tdi. Tog‘li hududlarning ayrim joylarida qor nisbatan kuchli yog‘di. Mamlakatning faqatgina shimoli-g‘arbiy hududi va cho‘l zonasida yog‘ingarchilik kuzatilmadi.

Qayd etilishicha, qor yog‘gan paytda 50−100 metrgacha bo‘lgan joylarda ko‘rish darajasi yomonlashdi. Yo‘llarni muz qopladi.

Foto: “Daryo”

Kechga yaqin mamlakatning markaziy va sharqiy mintaqalarida balandligi 6-14 santimetr, ba’zi joylarda esa 20−25 santimetrgacha bo‘lgan qor qoplami shakllandi. Qor qoplami ilgari shakllangan tog‘li hududlarda qor qalinligi 10−30 santimetrga yetdi.

Foto: “Daryo”

Kun davomida havo harorati 5−3 daraja sovuqdan oshmadi. Kechasi deyarli hamma joyda yog‘ingarchilik to‘xtadi, ayoz esa kuchaydi.

Toshkentda harorat 9 darajagacha sovuqqa tushib ketdi. Mamlakatning ba’zi joylarida 13−10 darajaga sovuq, shimolda va cho‘l zonasida 18−15 daraja sovuq qayd etilgan. Sinoptiklarning ta’kidlashicha, bu harorat o‘rtacha yillik ko‘rsatkichdan 10−15 darajaga past.

“O‘zgidromet”ning ta’kidlashicha, umuman olganda, noyabr oyining ikkinchi yarmida O‘zbekistonda qor yog‘ishi kamyob holat emas. Yomg‘irdan qorga o‘tish va beqaror qor qoplamining shakllanishi o‘tgan yili ham qayd etilgan va 2016-yilda deyarli shu yilgi sanada qor yog‘gan. Biroq sinoptiklarning ta’kidlashicha, bu davrda bunday past harorat juda kamdan kam kuzatiladi.

Bugun havo harorati 5−2 daraja sovuqni tashkil etmoqda. O‘zbekiston hududi bo‘ylab sovuq ob-havo kelasi hafta boshiga qadar davom etadi. Havo harorati kechasi 9−6 daraja sovuq, kunduzi 2 daraja sovuq, 3 daraja iliq atrofida bo‘lishi kutilmoqda.