Davlat tilida ish yuritish asoslarini o‘qitish va malaka oshirish markazi direktori Inomjon Azimov O‘zbekistonda uzog‘i bilan ikki yilda to‘liq lotin yozuviga o‘tilishini ma’lum qildi, deb xabar beradi “Kun.uz”.

Foto: “Kun.uz”

Inomjon Azimov jurnalistning lotin yozuviga to‘liq, uzil-kesil o‘tish jarayoni qancha vaqtni olishi to‘g‘risidagi savolga javob bergan.

“Savolingiz juda to‘g‘ri. Ikki xil yozuvda yurgan bizdek davlat biror yerda bo‘lmasa kerak. Xohlagan joyingiz, xohlagan vazirlik va tashkilotingizga boring, hamma istaganini qilyapti. Biror-bir mantiqqa to‘g‘ri kelmaydi. Har bir davlatning bir to‘xtamga kelgan yozuvi bo‘lishi kerak.

Fikrimcha, uzog‘i bilan ikki yilda biz to‘liq, hamma sohada lotin yozuviga o‘tishimiz kerak. Agar bu muddat yuqorida aytganimizdek, yana cho‘ziladigan bo‘lsa, keyin qiyin bo‘ladi.

Qo‘shnimiz Qozog‘istonni ko‘ring, ular lotin yozuviga o‘tamiz deb tayyorgarlik ko‘rishdi va hozir deyarli hamma tashkilotlari bu yozuvga o‘tib bo‘ldi”, — deydi markaz direktori.

Uning so‘zlariga ko‘ra, bu yo‘lda yordam beradigan kuch bu – OAV. “Birinchi navbatda OAV mana men deb chiqishi kerak va bizga yordam berishi kerak. Ular shunday yaxshi tashabbus bilan chiqishi kerak”, — deydi Azimov.

Shuningdek, Davlat tilida ish yuritish asoslarini o‘qitish va malaka oshirish markazi direktori uchinchi xil yozuv ham paydo bo‘lgani, bu ijtimoiy tarmoq yozuvlari ekanligini qayd etib o‘tgan. Azimovning ta’kidlashicha, bu yozuvni kirill yoki lotin deb bo‘lmaydi — ikkovi ham aralash. Shu bilan birga, u ijtimoiy tarmoqlardagi kanal, guruhlarni yuritayotganlarni odamlarga nimani o‘rgatayotgani haqida mas’uliyat bilan o‘ylashga chaqirgan.

“Yana bir bor qaytaraman, bizda bu borada hamma narsa tayyor va hammasi shunday ketsa, balki bir yilda ham lotin yozuviga to‘liq o‘ta olamiz. Buni kutish kerak emas. Mana onlayn ta’limga juda uzoq tayyorgarlik ko‘rishdi, lekin pandemiya tufayli majbur bo‘lindi va tezda onlayn ta’limga o‘tildi”, — deya qayd etadi Inomjon Azimov.

Eslatib o‘tamiz, 2018-yil 15-mayda “Lotin yozuviga asoslangan o‘zbek alifbosini keng joriy etish va yanada takomillashtirish bo‘yicha harakatlar rejasi” tasdiqlangan va reja bo‘yicha yil oxiriga qadar aniq taklif berilishi lozim edi. Keyinroq o‘zbek alifbosiga qanday o‘zgarishlar kiritilishi ham ma’lum bo‘lgandi.

Ma’lumot uchun, Qozog‘istonning sobiq prezidenti Nursulton Nazarboyev 2017-yilda qozoq alifbosini lotin yozuviga o‘tkazishni buyurgandi. Shundan so‘ng, mamlakat maxsus komissiyasi lotin yozuviga asoslangan qozoq аlifbosini ishlab chiqish bilan shug‘ullanishni boshlagan. Dastlab 2025-yilgacha lotin alifbosiga to‘liq o‘tish rejalashtirilgan edi, ammo keyinroq ushbu muddat surilgan.