Argentina terma jamoasi sobiq hujumchisi va bosh murabbiyi Diyego Maradona jarrohlik amaliyotini boshdan kechirdi.

Foto: Twitter

Argentinalik afsonada subdural gematoma aniqlangan. Bunday gematoma odatda bosh miya jarohati asoratlari natijasida paydo bo‘ladi. Yosh o‘tgandan keyin u surunkali gematomaga aylanishi mumkin.

Jarrohlik amaliyoti 80 daqiqa davom etgan va muvaffaqiyatli yakunlangan. Gematoma olib tashlangan.

60 yoshli sobiq futbolchi o‘ziga kelgan. Hozircha u intensiv terapiya bo‘limida qoladi va keyinchalik tiklanish muolajalarini boshlaydi. Taxminlarga ko‘ra Maradona bir oydan keyin odatiy turmush tarziga qaytishi mumkin.

Afsonaning operatsiya qilinishini eshitgan muxlislar shifoxona atrofida yig‘ildi. Ular kasalxona atrofini Diyegoni qo‘llab-quvvatlovchi turli bannerlar bilan to‘ldirib yubordi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!