Markaziy bank boshqaruvi 22-oktabr kuni o‘tkazilgan matbuot anjumanida asosiy stavkani yillik 14 foiz darajasida o‘zgarishsiz saqlab qolish to‘g‘risida qaror qabul qildi.
Markaziy bank matbuot xizmatining ma’lum qilishicha, ushbu qaror real foiz stavkalar ijobiyligini saqlab qolish, yuzaga kelgan vaqtinchalik inflyatsion xatarlar fonida iqtisodiy faollikni yanada rag‘batlantirish uchun qulay sharoitlarning yaratilishi va o‘rta muddatli davrda inflyatsiya dinamikasining yanada sekinlashishi o‘rtasidagi muvozanatni ta’minlashga qaratilgan.
“Markaziy bank inflyatsiyaning yil yakuni bo‘yicha prognozini yillik 11-12,5 foiz darajasida saqlab qoldi va hukumat bilan birgalikda unga erishish uchun barcha zaruriy choralarni ko‘radi.
Asosiy stavka bo‘yicha kelgusidagi qarorlar inflyatsiyaning joriy va prognoz dinamikasi shakllanishi, shuningdek, ichki va tashqi xatarlarni baholash asosida qabul qilinadi”, — deyiladi xabarda.
Eslatib o‘tamiz, Markaziy bank boshqaruvining 14-apreldagi qarori bilan asosiy stavka 1 foizga pasaytirilib, yillik 15 foiz darajasida belgilangan edi. Iyun oyida esa Markaziy bank asosiy stavkani pasaytirishi haqida xabarlar tarqaldi, biroq 11-iyun kuni asosiy stavka bo‘yicha qaror qabul qilingan va u 15 foiz miqdorida o‘zgarishsiz qoldirilgandi. 10-sentabr kuni Markaziy bank boshqaruvi asosiy stavkani 1 foizga pasaytirib, 14 foiz etib belgilagandi.
Izoh (0)