O‘zbekiston Avtomobil yo‘llari qo‘mitasi tomonidan tasdiqlangan standartlardagi yo‘l belgilari Rossiyadan ko‘chirib olingani aytildi

Oliy Majlis Senatining sakkizinchi yalpi majlisida 2020-yil 19-iyundagi parlament yuqori palatasining tegishli qaroriga muvofiq, yo‘l harakati xavfsizligini ta’minlash va sohaga oid qonun hujjatlarining ijro etilishi yuzasidan Vazirlar Mahkamasiga yuborilgan parlament so‘rovi natijalari muhokama qilindi.

Senatning Mudofaa va xavfsizlik masalalari qo‘mitasi raisi Qutbiddin Burhonov parlament so‘rovida ko‘tarilgan ba’zi masalalarning yechimiga e’tibor berilmaganini bildirdi.

Transport vazirligi huzuridagi Avtomobil yo‘llari qo‘mitasi tomonidan 2019-yilda tasdiqlangan yo‘l harakati xavfsizligi standartlari yuzaki ishlab chiqilgan. Standartlardagi yo‘l belgilarining tartib raqamlari ham to‘g‘ri belgilanmagan, bu esa yo‘l harakatining asosiy va ustuvor qoidalaridan hisoblanadi. Bundan tashqari, ushbu standartlar Rossiya Federatsiyasi standartlaridan to‘g‘ridan to‘g‘ri ko‘chirib olingan. Oqibatda Rossiyadagi amaldagi yo‘l harakati qoidalaridagi yo‘l belgilari ushbu standartlarning ilovalariga ham kiritilgan. Mazkur yo‘l belgilari O‘zbekiston Respublikasi Yo‘l harakati qoidalarida mavjud emas.

Qutbiddin Burhonov, Senatning Mudofaa va xavfsizlik masalalari qo‘mitasi raisi

Axborotdan so‘ng Senatning yoshlar, madaniyat va sport masalalari qo‘mitasi raisi Baxtiyor Sayfullayev Avtomobil yo‘llari qo‘mitasi vakillariga nima uchun standartlar Rossiyadan ko‘chirib olingani yuzasidan savol yo‘llagan.

2019-yilda tasdiqlangan yo‘l harakati xavfsizligi standartlarida O‘zbekistondagi mavjud va yangi yo‘l belgilarining hammasi jamlangan. Senatorlar tomonidan qayd etib o‘tilgan kamchiliklar nafaqat yo‘l belgilari standartida, balki boshqa standartlarimizda ham mavjud. Yuborilgan parlament so‘rovi natijasida IIV, mahalliy hokimiyat organlarining belgilarni o‘rnatuvchi maxsus qurilish-montaj boshqarmalari bilan ishlab, kamchiliklarni bartaraf qilish chora-tadbirlarini ishlab chiqdik.

Shuhrat Nazarov, Avtomobil yo‘llar qo‘mitasi raisining birinchi o‘rinbosari

Nazarov senatorning savoliga javoban chora-tadbirlardan o‘rin olgan yo‘l belgilarini takomillashtirish, ularni sinash yo‘llarini laboratoriyalarda tashkil qilish, kamchiliklarni inobatga olishni va’da berdi. Yangi standartlar asosida ishlab chiqilgan yo‘l belgilarini o‘rnatish ishlari tizimli tashkil qilingani, respublika bo‘yicha 409 000 dona yo‘l belgilari yetishmasligi, ularni to‘liq o‘rnatish ishlari 2023-yilgacha tashkil etilishini bildirdi. Mazkur ishlar mahalliy davlat hokimiyati organlari va Moliya vazirligi bilan kelishilgan holda har yilgi budjet parametrlarida ko‘zda tutilishi belgilangani ta’kidlandi.