O‘zbekistonda masjidlar soni yana bittaga ko‘payib, 2077 taga yetdi
Surxondaryo viloyati Muzrabot tumani “Xalq yo‘li” mahalla fuqarolar yig‘inida “Sayyid Habibulloxon” jome masjidi ochildi. Bu haqda Adliya vazirligi Jamoatchilik bilan aloqalar bo‘limi xabar berdi. Ma’lum qilinishicha, viloyat Adliya boshqarmasi tomonidan “Sayyid Habibulloxon” jome masjidi davlat ro‘yxatidan o‘tkazilgan.
Din ishlari bo‘yicha qo‘mita tomonidan xabar berilishicha, O‘zbekiston bo‘yicha masjidlar soni 2077 taga, Surxondaryo viloyatidagi masjidlar soni esa 116 taga yetgan.
Avvalroq Buxoro tumanida “Usmon ibn Affon” jome masjidi ochilgani va O‘zbekistonda masjidlar soni 2076 taga yetgani haqida xabar berilgandi.
Eslatib o‘tamiz, Respublika maxsus komissiyasi qarori bilan 2020-yil 10-iyuldan e’tiboran 1-avgustga qadar diniy tashkilotlar, jumladan, masjidlar faoliyati to‘xtatilgan edi. Keyinroq karantin cheklovlari 15-avgustga qadar uzaytirilgan, masjidlar esa 15-avgustdan so‘ng bosqichma-bosqich ochilishi kutilayotgani haqida xabar berilgandi. 17-avgustdan O‘zbekiston bo‘ylab karantindan keyingi ilk jamoat namozlari ado etildi.
