Samarqandda o‘z akasini uxlab yotgan vaqtida o‘ldirib, jasadini bo‘laklarga bo‘lgan holda kanalga oqizib yuborgan uka qo‘lga olindi. Bu haqda viloyat IIB axborot xizmati xabar berdi.
Ma’lumotlarga ko‘ra, marhum bedarak yo‘qolganlar ro‘yxatida bo‘lgan. Dastlabki ma’lumotlarga asosan u iyun oyida yashash manzilidan chiqib ketgani aytilgan. Tezkor qidiruv va surishtiruv ishlari davomida uni may oyidan buyon hech kim ko‘rmagani aniqlangan. Prokuratura hamda Ichki ishlar organlarining izlanishlari natijasida yo‘qolgan fuqaro topilgan. Dastlab uni o‘z ukasi o‘ldirgan va jasadni bo‘laklarga bo‘lib, Darg‘om kanalining Kimyogarlar qo‘rg‘oni yaqinidan oqib o‘tuvchi qismiga tashlagan degan taxminlar mavjud bo‘lgan. Shuningdek, may oyidan buyon qotillikni yashirib kelgan uka qilmishini tan olgan.
“Men akamni yo‘qotdim, o‘zimdan o‘tganini o‘zim bilaman. Akam edi, bitta edi… Yaxshi ko‘rardim. O‘sha kuni nima bo‘lganini bilmayman, o‘zimni boshqara olmaganman. Pushaymonman, lekin uni qaytarib bo‘lmaydi”, — deydi marhumning ukasi.
Ma’lumotlarga ko‘ra, marhum aka ukasini o‘z qaramog‘iga olgan, uni doimiy ish bilan ta’minlagan. Ta’kidlanishicha, qotillikning kelib chiqish sababi akaning ukasiga qilgan tanbehi ekanligi aniqlangan. Bundan g‘azablangan uka akasining uxlab yotganidan foydalanib, uni o‘ldirgan va bo‘laklarga bo‘lib, kanaldan oqizib yuborgan.
Ta’kidlanishicha, oradan besh oy vaqt o‘tgach, uning o‘zi akasining yo‘qolib qolganini aytib, IIBga murojaat qilgan. Surishtiruv va qidiruv ishlari natijasida bedarak yo‘qolgan aka ukasi tomonidan o‘ldirilgani ma’lum bo‘lgan. Mazkur holat yuzasidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilgan.
Mavzuga doir:
Izoh (0)