O‘rta Chirchiqda chorva o‘g‘irlashga “ixtisoslashgan” jinoiy guruh qo‘lga olindi

Toshkent viloyati O‘rta Chirchiq tumani Ichki ishlar bo‘limi tezkor xodimlari chorva o‘g‘irlashga “ixtisoslashgan” jinoiy guruhning 12 jinoyatini bir vaqtda fosh etdi. Bu haqda Toshkent viloyati IIBB matbuot xizmati xabar berdi.

Ular yettita mahalladan aholining 12 bosh molini o‘g‘irlagan. Jumladan, navbatdagi tadbir davomida “Darxon” mahallasi hududidan uch nafar noma’lum shaxslar shu yerda yashovchi fuqaroga tegishli, taxminiy narxi 7 million so‘m bo‘lgan bir bosh qora molni o‘g‘irlab ketayotgan vaqtida tezkor xodimlar tomonidan jinoyat ustida qo‘lga olingan.

Ushlangan shaxslar – O‘rta Chirchiq tumani “Mayramko‘l” mahallasida yashovchi 26 yoshli A.T. va uning sheriklari 25 yoshli Sh.Sh. hamda 36 yoshli Sh.Sh. ekanligi, ular jinoyatlarni puxta reja asosida may, avgust va sentabr oylarida sodir etganligi aniqlangan.

Shu vaqt oralig‘ida ular tomonidan yettita mahalla hududidan o‘g‘irlangan 11 bosh qora mol va 1 bosh qo‘chqor ashyoviy dalil sifatida olinib, o‘z egalariga tilxat asosida qaytarilgan.

Mazkur holatlar yuzasidan O‘rta Chirchiq tumani IIB TB tomonidan ushlangan shaxslarga nisbatan Jinoyat kodeksining 169-moddasi 2-qismi “v” bandi (bir guruh shaxslar tomonidan oldindan til biriktirib o‘g‘rilik sodir etish) bilan jinoyat ishi qo‘zg‘atilgan.