Buxoro viloyatining Shofirkon tumani hokimi Xalq deputatlari tuman kengashining navbatdagi sessiyasida hudud “qoniqarsiz” deb baholangani uchun xalqdan uzr so‘radi, deya xabar berdi “Daryo” muxbiri.

Foto: “Daryo”

Ma’lum bo‘lishicha, Shofirkon tumanida sanoat mahsulotlari hajmi 2019-yilda 340 milliard 753 million so‘m bo‘lib, aholi jon boshiga 1 million 941 ming so‘m to‘g‘ri kelgan. Bu ko‘rsatkich viloyat sanoatida bor-yo‘g‘i 0,6 foizni tashkil qilgan.

Tumanga 2020-yilning fevral oyida rahbarlik qilishni boshlagan Shukrulla Hakimovning izoh berishicha, u bu ko‘rsatkichlar meniki emas, deb turmasdan muammolarni to‘g‘rilashga harakat qilgan. Biroq shunga qaramay, tumanda tadbirkorlik rivojlanmay, “qizil” hudud deb baholangan.

Tuman hokimiga ko‘ra, elektr energiyadagi uzilishlar, tabiiy gaz bosimining pastligi sabab o‘z ishini yo‘lga qo‘yib rivojlangan qator tadbirkorlik subyektlari o‘z faoliyatini tumandan olib chiqib ketishga majbur bo‘lgan. Shuningdek, zaxirasi 5539 metr kub “Jilvon” qum-shag‘al konidan faqat qazib olishda foydalanilgan, qayta ishlash yo‘lga qo‘yilmagan. Tuman geografik joylashuv jihatidan cho‘l hududida joylashgan bo‘lishiga qaramasdan, bog‘dorchilik, chorvachilik, sabzavotchilik klasterlari yirik issiqxona xo‘jaliklari tashkil etilmagan.

Foto: “Daryo”

Shuningdek, tuman paxta va g‘allaga ixtisoslashgan tuman bo‘lsa-da, paxtani qayta ishlash imkoniyati yo‘qligi sabab yetishtiriladigan paxta mahsulotlari boshqa tumanlarda qayta ishlangan.

“To‘g‘risi, hozir men uchun juda og‘ir. Bunga esa o‘zimiz sababchimiz va o‘zimiz joyiga qo‘yamiz. Boshqa yo‘ldan borib bo‘lmaydi. Qaysidir sohada ko‘rsatkichlarni yuqoriga olib chiqishga harakat qildik. Qaysidir joyda e’tiborsiz bo‘ldik. Tuman hokimi hamda birinchi sektor rahbari sifatida 2019-yilda qo‘yilgan kamchiliklardan xulosa chiqargan holda barcha rahbarlar muhtaram Prezidentimizdan, xalqimizdan, tadbirkorlarimizdan uzr so‘raymiz. Bizga imkon berilsa, to‘rt sektor rahbarlari birgalikda 2020-yil yakuniga qadar tumanni ‘o‘rta’ hududga, 2021-yilning birinchi yarim yilligida esa ‘yaxshi’ hududga olib chiqishga va’da beramiz”, — dedi Shukrulla Hakimov.

Foto: “Daryo”

Qayd etilishicha, Shofirkonda aholi soni 177 400 kishi bo‘lib, xonadonlar 32 290 tani tashkil etadi. Respublikadan tashqaridagi aholisi soni esa 4900 nafar. Ishsizlar soni 7700 nafar bo‘lib, shundan ishsiz yoshlar soni 2100 nafarni tashkil qiladi.

Shukrulla Hakimov “Daryo” muxbirining ishsiz yoshlar muammosi qay darajada hal etilmoqda, degan savoliga “Rejamizdagi loyihalar ishga tushsa, kamida 2 100 ta yangi ish o‘rni yaratiladi, bu tuman eksport rejasining 6 million dollardan ortiq qismini qoplaydi va budjetga 6,0 milliard so‘mga yaqin tushum bo‘ladi. Bir yil desam noto‘g‘ri bo‘lar, ammo ikki-uch yilda tumanimiz yoshlarini eplab olamiz”, deya javob berdi.

Hokimning qo‘shimcha qilishicha, ikki nafar o‘rinbosari ishiga noloyiq bo‘lgani uchun lavozimini tark etgan.

“Shaxsan o‘zim bir kunda kamida 9-10 kilometr piyoda yuraman. Chunki aholining ichiga kirmasam, muammoni bilmayman. Afsuski, hamma kadrlar ham birdek emas. Investitsiya bo‘yicha o‘rinbosarim ishini uddalay olmagani uchun ariza yozib, ishdan bo‘shadi. Qurilish bo‘yicha o‘rinbosarim bilan esa kutilmagan voqea yuz berdi. Tumanimizdagi bozorda yangi inshoot qurila boshlangach, surishtirib ko‘rdik. Hokim qaroriga ko‘ra, qurilayotgan emish. Ammo hujjatlar ko‘tarilgach, bozor qo‘mitasiga qandaydir hujjat to‘g‘rilab berilgani aniq bo‘ldi. Hozirda qurilish bo‘yicha o‘rinbosarlikka loyiq nomzod izlanyapti”, — dedi tuman hokimi.

Foto: “Daryo”

Yosh hokim jon kuydirib gapirayotgan paytda esa tumanning ayrim mas’ullari uyquni afzal bilishdi.