Ukrainada qatorasiga to‘rtinchi kun koronavirus bo‘yicha kunlik rekord qayd etildi

Ukrainada 2-oktabr davomida 4661 kishida koronavirus aniqlangan. Bu bilan mamlakatda ketma-ket to‘rtinchi kun rekord darajada koronavirusga chalinish holati qayd etildi. Bu haqda “Korrespondent” xabar qildi.

Kun davomida 92 nafar ukrainalik koronavirus oqibatida vafot etdi. Bu kasallik qurbonlari soni mamlakatda jami 4353 kishini tashkil qilmoqda.

Qayd etilishicha, Ukrainada 1-oktabr kuni 4633 ta koronavirusga chalinish holati aniqlangan.

Jons Hopkins ma’lumotlariga ko‘ra, mamlakatda hammasi bo‘lib 222 322 kishida kasallik tasdiqlangan. Ularning 98 737 nafari kasallikdan forig‘ bo‘lgan.

Jahon sog‘liqni saqlash tashkiloti Ukrainada kunlik kasallanish ko‘rsatkichi kelgusi oylarda ikki baravar ko‘payishini va kuniga 7000 dan 9000 tagacha o‘sishini taxmin qilmoqda.

Avvalroq Zelenskiy Ukrainada koronavirusning ikkinchi to‘lqini ketayotganini ma’lum qilgandi.

Eslatib o‘tamiz, Kanada, Chexiya, Avstriya va Gruziyada ham koronavirusning ikkinchi to‘lqini boshlangani haqida xabar berilgan edi. Buyuk Britaniyada COVID-19 bilan bog‘liq vaziyat bahordagi ko‘rsatkichga qaytmoqda. Bir oydan beri turistlar uchun ochiq bo‘lgan Turkiyada koronavirus tarqalishi yana avj oldi. Isroil esa “germetik” karantin joriy qildi.