Tojikistonning O‘zbekiston bilan chegaralarni ochish masalasi koronavirus tarqalishiga qarshi kurash bo‘yicha respublika shtabi qaroriga muvofiq qabul qilinadi. Bu haqda Tojikiston TIVga tayanib Asia-Plus xabar bergan.
“Kuni kecha 1-oktabr kuni O‘zbekistondan chegaralarni ochish yuzasidan rasmiy xabarnomani qabul qilib oldik. Mazkur xat respublika shtabiga yuborilgan. Ayni vaqtda mazkur masala ko‘rib chiqish jarayonida”, – deyiladi Tojikiston TIV ma’lumotida.
Vazirlikning qayd etishicha, pandemiya tufayli respublika shtabi chegaralarni ochish masalasini ko‘rib chiqadi, cheklovlar va boshqa shartlarni belgilab beradi.
Eslatib o‘tamiz, O‘zbekiston 1-oktabrdan boshlab barcha davlatlar, jumladan Tojikiston uchun chegarlarini ochgan: bunda mamlakatlar cheklovlarga qarab guruhlarga ajratilgan.
Asia-Plus’ning yozishicha, “Do‘stiy” o‘tish punktida 1-oktabrdan boshlab bir necha kishi chegaradan o‘tishga muvaffaq bo‘lgan.
“O‘zbekiston hududiga bir necha kishi oilaviy sabablarga ko‘ra favqulodda o‘tkazilgan, Tojikistonga esa mamlakatdagi oliy ta’lim muassasalarida o‘qiydigan talabalarning avtobusi kiritilgan”, – deyiladi chegara punktining xabarida.
Qayd etilishicha mazkur holatlarning barchasida zarur ehtiyot choralari amalga oshirilgan.
Tojikistonni O‘zbekiston bilan bog‘lab turuvchi boshqa bir o‘tish punktida 11-oktabrdan boshlab, mamlakatda Prezidentlik saylovlari o‘tganidan keyin chegaralar ochilishi ma’lum qilingan.
“Ozodlik” nashrining ma’lum qilishicha, “Paxtaobod” va “Fotihobod” punktlarida tojikistonlik chegarachilar O‘zbekistonda rafiqasi yoki turmush o‘rtog‘i yashaydiganlar qo‘shni davlat hududiga o‘tishi mumkinligini bildirgan.
Shuningdek, ular O‘zbekistondagi tojikistonliklar vatanga qaytishi mumkinligini ham tasdiqlagan. Haydovchilari Tojikiston fuqarolari bo‘lgan Rossiya davlat raqamiga ega yuk mashinalarining ham mamlakatga kirishiga ruxsat berilgan.
Izoh (0)