O‘zbekistonda magistratura imtihon javoblari nega kechikayotganligi to‘g‘risida izoh berildi

O‘qishning magistratura ta’lim shakli bo‘yicha bu yil pandemiya sababli imtihonlar onlayn tarzda o‘tganidan xabaringiz bor. 2020–2021-o‘quv yili uchun imtihonlar 8–20-sentabr kunlari bo‘lib o‘tdi va to‘plangan ballari e’lon qilindi, lekin yakuniy natijalar haligacha kechikmoqda. Shu masala yuzasidan 29-sentabr kuni oliy ta’lim boshqarma boshlig‘i Abduvali Xoliqov AOKAda bo‘lib o‘tgan matbuot anjumanida izoh berdi.

Bizda apellyatsiya jarayonlari yakunlandi. Mutaxassislar tomonidan tekshirilgan apellyatsiya natijalari ham tegishli oliy ta’lim muassasalariga taqdim etildi. Yakuniy natijalar vazirlik tomonidan umumlashtirilib, davlat komissiyasiga taqdim etiladi. Davlat komissiyasi tomonidan tasdiqlangandan keyin bu natija e’lon qilinadi. Natijalarni komissiya tasdiqlaganidan keyin oliy ta’lim muassasalariga topshiramiz. Abituriyentlar imtihon natijalarini o‘zining shaxsiy kabineti orqali bilib olishlari mumkin.

Abduvali Xoliqov, Oliy ta’lim boshqarma boshlig‘i

Ma’lumot uchun,  2020–2021-o‘quv yilida magistraturaga 73 ming abituriyent hujjat topshirgan bo‘lib, imtihon 13 ta hududdagi 19 ta OTMda, onlayn shaklda o‘tkazilgan.