“Milan” qaytmoqda. Ibragimovich jamoadoshlari 16 ta o‘yindan beri yutqazmayapti

“Milan” Yevropa Ligasi 3-saralash bosqichi doirasida “Bude-Glimt” klubini 3:2 hisobida mag‘lub etdi va keyingi bosqichga chiqdi.

Bu milanliklar uchun o‘tgan mavsumdagi bahslarni ham hisobga olganda mag‘lubiyatsiz 16-o‘yin bo‘ldi. “Rossonerilar” bu vaqt davomida 12 ta bahsda g‘alaba qozondi, 4 ta o‘yinda esa durang o‘ynadi.

So‘nggi bor Zlatan Ibragimovich jamoadoshlari 2020-yil martida (koronavirus pandemiyasi sabab yuzaga kelgan tanaffusdan oldin) A Seriya doirasida “Jenoa”ga 1:2 hisobida yutqazgandi.

“Milan” A Seriyaning navbatdagi turida “Krotone”ga qarshi maydonga tushadi. Yevropa Ligasining navbatdagi bosqichida esa klub Portugaliyaning “Riu Ave” klubiga qarshi o‘ynaydi. Mazkur bahs 1-oktabrga belgilangan.

Eslatib o‘tamiz, avvalroq “Milan” hujumchisi Zlatan Ibragimovichda koronavirus aniqlangani haqida xabar berilgandi.