Afrikada noyob tog‘ gorillasini o‘ldirgan erkak 11 yilga qamaldi, deb xabar beradi CNN.

Foto: Legion Media

Ugandalik Byamukama Feliks o‘tgan oyda gorilla o‘ldirganini tan olgan. Halok bo‘lgan gorilla Bvindi milliy bog‘i hududida yashovchi Nkuringo guruhiga kirgan.

Rafiki laqabli gorilla turistlar orasida juda mashhur bo‘lgan. U 1-iyul kuni bedarak yo‘qolgan deya e’lon qilingan, ertasi kuni esa bog‘ hududidan uning jasadi topilgan. Tekshirish natijalari Rafiki qorin qismiga o‘tkir tig‘li jism orqali yetkazilgan jarohatdan so‘ng vafot etganini ko‘rsatgan.

Uning qotili oradan bir necha kun o‘tib qo‘lga olingan. Hukumat vakillarining so‘zlariga ko‘ra, jinoyatchining yonidan cho‘chqa go‘shti va ov anjomlari topilgan. Feliks bir necha band bo‘yicha ayblovlarni tan olgan — gorillani o‘ldirish, qo‘riqlanayotgan hududga kirish va noqonuniy go‘sht saqlash.

Ayblanuvchining so‘zlariga ko‘ra, u Rafikini do‘stlari bilan bog‘ hududida ov qilib yurganida o‘zini himoya qilish maqsadida o‘ldirgan. Voqeaning qolgan uch ishtirokchisi ham hozirda qamoqda, biroq ular qotillik bo‘yicha ayblovni tan olmagan.

Nkuringo guruhida 17 ta gorilla mavjud bo‘lib, Rafiki yana uchta yirik gorilladan iborat guruhga kirgan. Tog‘ gorillalari — dunyodagi primatlarning eng kamyob turlaridan hisoblanadi. Hozirda ularning butun dunyo bo‘ylab mingga yaqini yashamoqda.