Kvinslend shtatidagi mehmonxonalardan biri zina bo‘ylab ko‘tarilib, tashrif buyuruvchilarning dam olishiga xalaqit berayotgan ikkita tuyaqushning ushbu maskanga kirishini taqiqlab qo‘ydi, deb xabar beradi Travel and Leisure.
Foto: Travel and Leisure
Tuyaqushlarning laqabi Kevin va Kerol bo‘lib, ular mehmonxona yaqinida yashaydi. Avvaliga qushlar mehmonlarning qiziqishini uyg‘otib kelgan, biroq keyinchalik ular tashrif buyuruvchilarning muammosiga aylana boshlagan. Emular zina bo‘ylab ko‘tarilishni o‘rganib olib, mehmonlarning shaxsiy buyumlarini o‘g‘irlay boshlagan. Tuyaqushlardan biri bir safar mashina kalitini o‘g‘rilagan va yuvinish xonasigacha kirib borgan.
Mehmonxona egasi Kris Gimblettning so‘zlariga ko‘ra, tuyaqushlarning o‘zini bu qadar nomaqbul tutishiga yo‘l qo‘ya olmaydi. Shu sababli ularning mehmonxonaga kirishi taqiqlandi, Kris buning uchun maxsus darvoza ham o‘rnatgan. Biroq emular tezda taslim bo‘lish niyatida emas, ular kirish eshigi tagida qorovullik qilib, birorta turist ularni ichkariga kiritishiga umid qilmoqda.
