Kurbanoff.net Telegram-kanali 23-iyulda kislorod konsentratorining narxlari to‘g‘risida ma’lumot e’lon qildi. Unga ko‘ra, davlat xaridlari bo‘yicha elektron do‘kon eshop.uzex.uz veb-saytida kislorod konsentratorining narxi 11 va 30 million so‘mni, olx.uz veb-saytida esa 7,7 million so‘mni tashkil etgan. Muallif, birozdan so‘ng, olx.uz veb-saytida yuqorida ko‘rsatilgan narxda kislorod konsentratori ayni paytda mavjud emasligi va davlat xaridlari bo‘yicha ko‘rsatilgan narxlar tuzilgan bitimlarning narxlari emasligini ko‘rsatib o‘tgan.
O‘zbekiston tovar-xomashyo birjasi mazkur masalaga oydinlik kiritish maqsadida qo‘shimcha ma’lumotlarni e’lon qildi. Bildirilishicha, elektron do‘konga joylashtirilgan narxlar ishtirokchilar (sotuvchilar)ning ommaviy ofertasi hisoblanib, davlat xaridlari ushbu narxlarda amalga oshirilganligini anglatmaydi. Elektron do‘konda bitimlar narxlar so‘rovi mexanizmining qo‘llanilishi natijasida ofertada ko‘rsatilgan narxdan pastroq bahoda tuzilishi mumkin.
“Misol uchun, so‘nggi ma’lumotlarga ko‘ra, 2020-yil 14-iyulda xarid.uz davlat xaridlari bo‘yicha maxsus axborot portalida kislorod konsentratorini sotish bo‘yicha bitim tuzilgan. O‘tkazilgan savdo natijalariga ko‘ra kislorod konsentratorining bir komplekti uchun boshlang‘ich narxi 9 800 000 so‘m, xarid narxi esa 9 408 000 so‘mni tashkil etgan. Bunda budjet mablag‘larini tejalishi 392 000 so‘mni tashkil qildi. Tibbiy uskuna Qashqadaryo viloyatining ftiziatriya shifoxonasi tomonidan xarid qilingan.
Umuman olganda, 2020-yilning boshidan buyon xarid.uz davlat xaridlari bo‘yicha maxsus axborot portalida jami 1 849,6 milliard so‘mlik bitimlar tuzildi. O‘tkazilgan raqobatli elektron savdolar natijasida budjet va korporativ buyurtmachilarining mablag‘larining tejalishi 403,4 milliard so‘mni tashkil etdi (boshlang‘ich narxga nisbatan 18 foiz)”, — deyiladi xabarda.
Birja, shuningdek, OAV vakillari va blogerlarni davlat xaridlariga doir materiallarni tayyorlash chog‘ida, berilayotgan ma’lumotlarni obyektivligi va haqqoniyligini ta’minlash maqsadida O‘zbekiston respublikasi tovar-xomashyo birjasi AJ PR bo‘limi va davlat xaridlari sohasidagi vakolatli organ — Moliya vazirligining axborot xizmatiga murojaat qilishga chaqirdi.
Avvalroq Buxoro viloyatida koronavirus bilan og‘rigan bemorlarga yordam berish maqsadida Dynmed kompaniyasining har biri 12 million so‘m turuvchi 50 dona tibbiyot kontsentratorini sotib olgani haqida xabar berilgandi. Telegram’da “Bakiroo” kanali yurituvchisi Otabek Bakirov Dynmed kompaniyasining kislorod konsentratorlari Alibaba’da 320 dollardan taklif etilayotganini, agar 100 tadan ortiq olinsa, 220 dollardan sotilayotganini yozib qoldirdi. Shuningdek, “Troll.uz” kanalida ham 50 dona konsentrator orasidagi farq 436 million so‘m ekani tanqid qilingan.
Buxoro hokimi o‘rinbosari Mirali Hamroyev davlat hokimiyati va boshqaruvi organlari tomonidan olib borilayotgan ishlarga asossiz xulosa berilayotganini qoralashini bildirib, bloger aytayotgan narxda kislorod konsentratori bor bo‘lsa, xarid qilishga tayyorligini aytgan.
“Gazeta.uz” ushbu tibbiyot uskunasining asl narxi qancha ekani va uni yetkazib beruvchi tadbirkorlik subyekti haqidagi ma’lumotlarni taqdim etdi.
Ma’lumot uchun, 20-iyul kuni Shavkat Mirziyoyev O‘zbekistonda koronavirus infeksiyasiga qarshi kurash borasida olib borilayotgan ishlarning chuqur tanqidiy tahliliga bag‘ishlangan videoselektor yig‘ilishida kislorod konsentratorlarini O‘zbekistonga olib kelish uchun maxsus samolyot ajratish haqida ko‘rsatma bergandi. Vazirlar Mahkamasining qarori bilan O‘zbekistonga dori vositalari va tibbiy buyumlarni, jumladan, kislorod konsentratorlarini import qilish jarayoni soddalashtirildi.
Izoh (0)