Kurbanoff.net Telegram-канали 23 июлда кислород концентраторининг нархлари тўғрисида маълумот эълон қилди. Унга кўра, давлат харидлари бўйича электрон дўкон eshop.uzex.uz веб-сайтида кислород концентраторининг нархи 11 ва 30 миллион сўмни, olx.uz веб-сайтида эса 7,7 миллион сўмни ташкил этган. Муаллиф, бироздан сўнг, olx.uz веб-сайтида юқорида кўрсатилган нархда кислород концентратори айни пайтда мавжуд эмаслиги ва давлат харидлари бўйича кўрсатилган нархлар тузилган битимларнинг нархлари эмаслигини кўрсатиб ўтган.
Ўзбекистон товар-хом ашё биржаси мазкур масалага ойдинлик киритиш мақсадида қўшимча маълумотларни эълон қилди. Билдирилишича, электрон дўконга жойлаштирилган нархлар иштирокчилар (сотувчилар)нинг оммавий офертаси ҳисобланиб, давлат харидлари ушбу нархларда амалга оширилганлигини англатмайди. Электрон дўконда битимлар нархлар сўрови механизмининг қўлланилиши натижасида офертада кўрсатилган нархдан пастроқ баҳода тузилиши мумкин.
«Мисол учун, сўнгги маълумотларга кўра, 2020 йил 14 июлда xarid.uz давлат харидлари бўйича махсус ахборот порталида кислород концентраторини сотиш бўйича битим тузилган. Ўтказилган савдо натижаларига кўра кислород концентраторининг бир комплекти учун бошланғич нархи 9 800 000 сўм, харид нархи эса 9 408 000 сўмни ташкил этган. Бунда бюджет маблағларини тежалиши 392 000 сўмни ташкил қилди. Тиббий ускуна Қашқадарё вилоятининг фтизиатрия шифохонаси томонидан харид қилинган.
Умуман олганда, 2020 йилнинг бошидан буён xarid.uz давлат харидлари бўйича махсус ахборот порталида жами 1 849,6 миллиард сўмлик битимлар тузилди. Ўтказилган рақобатли электрон савдолар натижасида бюджет ва корпоратив буюртмачиларининг маблағларининг тежалиши 403,4 миллиард сўмни ташкил этди (бошланғич нархга нисбатан 18 фоиз)», — дейилади хабарда.
Биржа, шунингдек, ОАВ вакиллари ва блогерларни давлат харидларига доир материалларни тайёрлаш чоғида, берилаётган маълумотларни объективлиги ва ҳаққонийлигини таъминлаш мақсадида Ўзбекистон республикаси товар-хом ашё биржаси АЖ PR бўлими ва давлат харидлари соҳасидаги ваколатли орган — Молия вазирлигининг ахборот хизматига мурожаат қилишга чақирди.
Аввалроқ Бухоро вилоятида коронавирус билан оғриган беморларга ёрдам бериш мақсадида Dynmed компаниясининг ҳар бири 12 миллион сўм турувчи 50 дона тиббиёт контцентраторини сотиб олгани ҳақида хабар берилганди. Telegram’да «Bakiroo» канали юритувчиси Отабек Бакиров Dynmed компаниясининг кислород концентраторлари Alibaba’да 320 доллардан таклиф этилаётганини, агар 100 тадан ортиқ олинса, 220 доллардан сотилаётганини ёзиб қолдирди. Шунингдек, «Troll.uz» каналида ҳам 50 дона концентратор орасидаги фарқ 436 миллион сўм экани танқид қилинган.
Бухоро ҳокими ўринбосари Мирали Ҳамроев давлат ҳокимияти ва бошқаруви органлари томонидан олиб борилаётган ишларга асоссиз хулоса берилаётганини қоралашини билдириб, блогер айтаётган нархда кислород концентратори бор бўлса, харид қилишга тайёрлигини айтган.
«Gazeta.uz» ушбу тиббиёт ускунасининг асл нархи қанча экани ва уни етказиб берувчи тадбиркорлик субъекти ҳақидаги маълумотларни тақдим этди.
Маълумот учун, 20 июль куни Шавкат Мирзиёев Ўзбекистонда коронавирус инфекциясига қарши кураш борасида олиб борилаётган ишларнинг чуқур танқидий таҳлилига бағишланган видеоселектор йиғилишида кислород концентраторларини Ўзбекистонга олиб келиш учун махсус самолёт ажратиш ҳақида кўрсатма берганди. Вазирлар Маҳкамасининг қарори билан Ўзбекистонга дори воситалари ва тиббий буюмларни, жумладан, кислород концентраторларини импорт қилиш жараёни соддалаштирилди.