O‘zbekistonda yaqinda tashkil etilgan Korrupsiyaga qarshi kurashish agentligi malakali kadrlarni ishga taklif qilmoqda. Bu haqda agentlik matbuot xizmati xabar berdi.
Tanlovda ishtirok etish istagini bildirgan nomzodlardan agentlik veb-sayti orqali onlayn ariza to‘ldirishlari va hujjatlarni elektron yuborishlari lozim.
Shuningdek, ushbu saytda tanlov o‘tkazish tartibi, muddati, vakansiyalar, nomzodlarga qo‘yiladigan talablar, hujjat shakllari va boshqa qo‘shimcha ma’lumotlar joylashtirilgan.
Saralash jarayoni quyidagi bosqichlarda o‘tkaziladi:
- Hujjatlar qabuli;
- Arizalar va hujjatlarni ko‘rib chiqish va baholash;
- Test sinovlarini o‘tkazish;
- Psixologik test va psixofiziologik ko‘rikdan o‘tkazish (alohida hollarda poligrafologik o‘rganish ham o‘tkazilishi mumkin);
- Individual suhbat.
Hujjatlar 2020-yil 3-avgustga qadar qabul qilinadi. Murojaat uchun @antikoruz_bot’ga yozish lozim.
Eslatib o‘tamiz, Korrupsiyaga qarshi kurashish agentligi Prezident farmoni bilan 2020-yil, 29-iyunda tashkil etilgandi. Agentlik korrupsiyaning oldini olish va unga qarshi kurashish sohasida davlat siyosatini shakllantirish va amalga oshirishda maxsus vakolatli davlat organi hisoblanadi. Uning asosiy vazifasi mamlakatda korrupsiya holatini tizimli tahlil qilishdir.
Izoh (0)