Qozog‘istonda tamaki mahsulotlarini 21 yoshdan kichik fuqarolarga sotish taqiqlab qo‘yildi
Qozog‘iston prezidenti Qosim-Jo‘mart To‘qayev “Xalq sog‘lig‘i va sog‘liqni saqlash tizimi haqidagi” kodeksni imzoladi, unda tamaki mahsulotlari savdosi uchun cheklovni 18 yoshdan 21 yoshga oshirib qo‘yish ko‘zda tutilgan. Bu haqda Qozog‘iston prezidentining matbuot xizmati xabar qildi.
“Qozog‘iston prezidenti “Xalq sog‘lig‘i va sog‘liqni saqlash tizimi haqidagi” kodeksni imzoladi”, – deyilgan xabarda.
Avval parlament ushbu qonun loyihasini tasdiqlagandi. Unda nafaqat tamaki mahsulotlari, xususan, alkogol mahsulotlarini ham sotishni 21 yoshdan belgilash taklif qilingan, shuningdek, fuqarolar davolanish yoki boshqa tibbiyot aralashuvlariga, jumladan, profilaktik emlashlarga rozi bo‘lishi yoki ularni rad qilishi mumkinligi ham kodeksda belgilab qo‘yilgan.
O‘zbekistonda Vazirlar Mahkamasining 2016-yil 10-iyundagi 199-son qarori bilan “O‘zbekiston Respublikasida chakana savdo qoidalarini hamda O‘zbekiston Respublikasida umumiy ovqatlanish mahsulotlarini (xizmatlarni) ishlab chiqarish va sotish qoidalarini tasdiqlash to‘g‘risida”gi qarorga o‘zgartirish va qo‘shimchalar kiritilgan. Unga ko‘ra, alkogolli mahsulotlarni va tamaki mahsulotlarini sotayotgan sotuvchi ko‘rinishi 20 yoshdan kichik ko‘ringan xaridordan uning yoshini tasdiqlovchi hujjatni ko‘rsatishni talab qilishi, hujjat mavjud bo‘lmagan taqdirda esa sotishni rad etishi shartligi haqidagi majburiyat kiritilgan.
