O‘zbekiston Prezidenti Shavkat Mirziyoyev “Raqobat muhitini yanada rivojlantirish va iqtisodiyotda davlat ishtirokini qisqartirish bo‘yicha qo‘shimcha chora-tadbirlar to‘g‘risida”gi farmonni imzoladi. Bu haqda “O‘zbekiston 24” telekanali xabar berdi, deb yozmoqda Spot.
Farmonga ko‘ra, 2020-yil 1-oktabrdan boshlab bir turdagi mahsulot bozorida besh yoki undan ortiq xususiy kompaniya mavjud bo‘lgan taqdirda (mudofaa va milliy xavfsizlik maqsadida tashkil etilgan kompaniyalardan tashqari), davlat ishtirokidagi kompaniyalar, ularga biriktirilgan shaxslar va davlat muassasalari tashkil etilmaydi.
Shuningdek, farmonda davlat xaridlari mexanizmiga o‘zgartirishlar kiritilishi ko‘zda tutilgan. Xususan, 2021-yil 1-yanvardan boshlab ijrochilar g‘olib deb e’lon qilingan kundan boshlab ikki kun ichida 25 foiz va undan ortiq ulushga ega aksiyadorlar to‘g‘risidagi ma’lumotlarni e’lon qilishi kerak bo‘ladi.
Shu va boshqa tadbirlar natijasida quyidagilarga erishish kutilmoqda:
- monopol korxonalar soni 40 foizga qisqaradi;
- mamlakatning xalqaro reytinglardagi o‘rni va investitsion jozibadorligi oshadi;
- biznesning ishtiroki kengayadi;
- ish o‘rinlari soni ko‘payadi.